vizag gas leak : విశాఖ గ్యాస్ లీకేజీ బాధితులకు ఆరోగ్యశ్రీ ద్వారా ఉచిత చికిత్స....

విశాఖపట్నంలోని ఎల్జీ పాలిమర్స్ గ్యాస్ లీకేజీ ఘటనలో బాధితులకు సాంత్వన కలిగించే మరో వార్తను ప్రభుత్వం చెప్పింది. బాధితులు ఆరోగ్య శ్రీ పథకం కింద ఏ ఆస్పత్రిలోనైనా చికిత్స తీసుకునేందుకు వీలుగా ఆదేశాలు ఇచ్చింది.

విశాఖపట్నంలోని ఆరోగ్య శ్రీ పథకం కింద అనుసంధానం అయిన, అనుసంధానం కానీ ఏ ఆస్పత్రిలోనైనా వీరు చికిత్స తీసుకోవచ్చని ప్రభుత్వం తెలిపింది. ఈ మేరకు ఆస్పత్రులకు సమాచారం ఇచ్చామని, బాధితుల చికిత్స కోసం అయ్యే ప్రతీ రూపాయినీ ప్రభుత్వం ఆరోగ్య శ్రీ ట్రస్టు నుంచి చెల్లిస్తుందని ఆదేశాల్లో పేర్కొన్నారు.

విశాఖపట్నం పరిధిలో ఉన్న ఆస్పత్రుల్లో ప్రస్తుతం కొన్నింటిని కోవిడ్ ఆస్పత్రులుగా మార్చారు. ఇవి కాకుండా ఏ ప్రైవేటు, ప్రభుత్వ ఆస్పత్రిలోనైనా గ్యాస్ ప్రమాద బాధితులు చికిత్స తీసుకోవచ్చని ప్రభుత్వం ఓ ప్రకటనలో సూచించింది. ఇంకా ఏమైనా అనుమానాలుంటే విశాఖపట్నం జిల్లా ఆరోగ్య శ్రీ పథకం సమన్వయకర్త డాక్టర్ భాస్కరరావును సెల్ ఫోన్ నంబరు 8333814019లో సంప్రదించవచ్చని ప్రభుత్వం తెలిపింది.

English summary

andhra pradesh govt has allowed visakhpatnam polymer industry gas leak victims to take treatment through ysr arogya sri scheme in any hospital. after his visit to victims, cm jagan has issued orders in this regard.