గుర్రంలా పరిగెడుతుంది.. గాడిదలా మోస్తుంది.. ఇది మన ఊరి బండి!
TVS XL 100: భారత్లో వ్యవసాయ రంగం అనేది వెన్నెముక వంటిది. అన్నదాత లేకపోతే దేశంలో ఆకలి తాండవిస్తుంది. అయితే ఈ రోజుల్లో బండి లేకుండా ఎవరికి పనులు కావడం లేదు. అలాంటిది నిత్యం కష్టపడే రైతు సోదరులకు వారి రోజువారీ అవసరాల కోసం, పొలం పనులు, మార్కెట్కు సరుకు రవాణా వంటి వాటికి ఓ నమ్మకమైన, తక్కువ నిర్వహణ ఖర్చు ఉండే వాహనం అవసరం. అలాంటి బండ్లలో దశాబ్దాలుగా రైతులకు అత్యంత ఇష్టమైన ఎంపికగా నిలిచింది ఈ టీవీఎస్ ఎక్స్ఎల్ 100 మొపెడ్. ఈ బండి రైతులకు ఓ మిత్రుడిగా నిలిచిందంటే అతిశయోక్తి లేదు. రైతులకు ఈ టీవీఎస్ ఎక్స్ఎల్ మొపెడ్ బెస్ట్ ఛాయిస్ కావడానికి గల ప్రధాన కారణాలేంటో ఇక్కడ తెలుసుకుందాం.
1. బరువు మోసే సామర్థ్యం
టీవీఎస్ ఎక్స్ఎల్ మొపెడ్ కేవలం ఓ వ్యక్తి ప్రయాణించడానికి మాత్రమే కాకుండా అధిక బరువును మోయడానికి కూడా రూపొందించబడింది. దీని ఫ్రేమ్ చాలా ధృడంగా ఉండడంతో రైతులు పొలం పనులు లేదా సరుకులను మార్కెట్ కు తీసుకెళ్లేందుకు ఉపయోగించవచ్చు. రైతులు పాలు, కూరగాయలు, ఎరువులు లేదా వ్యవసాయ పనిముట్లు వంటి వాటిని సులభంగా రవాణా చేయగలరు. టీవీఎస్ ఎక్స్ఎల్ మొపెడ్తో ఎటువంటి దారిలో అయినా ఎరువుల బస్తాలను తీసుకెళ్లే సౌకర్యం ఉంది. పొలం గట్లపై కూడా ఈ బండి పరుగులు పెడుతుంది. దీని వెనుక భాగంగా, ముందు వైపు కూడా బరువును కట్టడానికి అనుకూలంగా ఉంటుంది.
2. అద్భుతమైన మైలేజ్
అన్నదాతలకు పెట్రోల్ ఖర్చులు భారం కాకుండా ఉండడానికి మైలేజ్ అనేది ప్రధాన అంశం. టీవీఎస్ ఎక్స్ఎల్ మొపెడ్ 100సీసీ (100cc) ఇంజన్తో నడుస్తుంది. ఇది అద్భుతమైన ఇంధన సామర్థ్యాన్ని (మైలేజ్) అందిస్తుంది. దీనివల్ల రైతులకు రోజువారీ ప్రయాణ ఖర్చు బాగా తగ్గుతుంది.
3. తక్కువ మెయింటెనెన్స్
రైతులు తమ బండి కోసం ఎక్కువ డబ్బులు ఖర్చు చేయకుండా ఉండాలని కోరుకుంటారు. టీవీఎస్ ఎక్స్ఎల్ మొపెడ్ కు మెయింటెనెన్స్, సర్వీసింగ్ ఖర్చులు చాలా తక్కువగా ఉంటాయి. ఇది గతుకుల రోడ్లు, పొలాల వద్ద ఉండే కఠినమైన వాతావరణాన్ని తట్టుకునే విధంగా దృఢమైన భాగాలతో తయారైంది.
4. సులభమైన డ్రైవింగ్
టీవీఎస్ ఎక్స్ఎల్ మొపెడ్ తక్కువ బరువును కలిగి ఉండటం వల్ల రద్దీగా ఉండే మార్కెట్ ప్రాంతాల్లో లేదా ఇరుకైన పొలాల గట్లపై కూడా సులభంగా నడపడానికి, నియంత్రించడానికి వీలు కల్పిస్తుంది. దీనికి గేర్లు మార్చాల్సిన అవసరం ఉండదు. కేవలం స్టార్ట్ చేసి రేస్ ఇవ్వడం ద్వారా సులభంగా ప్రయాణించవచ్చు.
5. అందుబాటులో ధర
కొత్తగా వాహనాన్ని కొనుగోలు చేయాలనుకునే రైతులకు టీవీఎస్ ఎక్స్ఎల్ 100 ధర చాలా తక్కువగా, అందుబాటులో ఉంటుంది. మార్కెట్లో ఉన్న ఇతర టూవీలర్లతో పోలిస్తే ఇది అత్యంత చౌకైన వాహనాలలో ఒకటిగా నిలుస్తుంది. ఈ అద్భుతమైన ఫీచర్ల వల్ల టీవీఎస్ ఎక్స్ఎల్ మొపెడ్ అనేది నమ్మకానికి, పనికి, పొదుపుకు చిహ్నంగా మారింది. అందుకే రైతుల పనుల్లో భాగమై నిజమైన స్నేహితుడిగా నిలుస్తోంది.
Click it and Unblock the Notifications
Sign in with Google