టీమిండియాకు వరుస షాకులు ? ఆప్ఘన్ టీ20 సిరీస్, ఐపీఎల్ కూ ఆల్ రౌండర్ దూరం ?

టీమిండియా ఆటగాళ్ల గాయాల పరంపర కొనసాగుతోంది. ఇప్పటికే పలువురు కీలక ఆటగాళ్లు గాయాలతో వరుసగా టోర్నీలకు దూరమవుతున్నారు. ఇలా దూరమవుతున్న క్రికెటర్ల జాబితా అంతకంతకూ పెరుగుతోంది. తాజాగా దక్షిణాఫ్రికాతో వన్డే సిరీస్ గెలిపించిన సూర్యకుమార్ యాదవ్, ఓపెనర్ రుతురాజ్ గైక్వాడ్ వంటి వారు జట్టుకు దూరం కాగా.. ఇప్పుడు రాబోయే సీరీస్ లకు కీలక ఆటగాళ్లుగా భావిస్తున్న వారు కూడా ఇదే బాటలో ఉన్నారు.

భారత్ వేదికగా జరిగిన వన్డే వరల్డ్ కప్ లో గాయపడ్డ స్టార్ ఆల్ రౌండర్ హార్ధిక్ పాండ్యా ఇప్పుడు తదుపరి సిరీస్ లకు కూడా దూరమయ్యేలా కనిపిస్తున్నాడు. ముఖ్యంగా త్వరలో ఆప్ఘనిస్తాన్ తో జరిగే మూడు టీ20ల సిరీస్ కు పాండ్యా దూరం కావడం ఖాయమైంది. అలాగే వచ్చే ఏడాది జరిగే ఐపీఎల్ 2024కు కూడా హార్ధిక్ పాండ్యా అందుబాటులో ఉండకపోవచ్చని తెలుస్తోంది. దీంతో టీమిండియాతో పాటు ముంబై ఇండియన్స్ కు కూడా సమస్యలు తప్పేలా లేవు.

2023 వన్డే ప్రపంచకప్‌లో భారత ఆల్‌రౌండర్ హార్దిక్ పాండ్యా చీలమండ గాయానికి గురయ్యాడు. ఆ తర్వాత టోర్నీ మొత్తానికి దూరమయ్యాడు. స్వదేశంలో ఆస్ట్రేలియాతో జరిగిన వైట్-బాల్ సిరీస్, డిసెంబర్‌లో దక్షిణాఫ్రికాలో జరిగిన టూర్ కూ దూరమయ్యాడు. వచ్చే జనవరి ప్రారంభంలో ఆఫ్ఘనిస్తాన్‌తో జరిగే మూడు మ్యాచ్‌ల టీ20 సిరీస్‌కు హార్ధిక్ కోలుకుంటాడని భావించినప్పటికీ... తాజా రిపోర్ట్ ప్రకారం ఆ ఛాన్స్ లేదని తెలుస్తోంది.

టీమిండియా జనవరి 11 నుంచి 17 మధ్య ఆఫ్ఘనిస్తాన్‌తో మూడు మ్యాచ్‌ల టీ20 సిరీస్‌లో తలపడుతుంది. ఇది జూన్‌లో జరిగే ప్రపంచ కప్‌కు ముందు వారి చివరి టీ20 అసైన్‌మెంట్‌. జోహన్నెస్‌బర్గ్‌లో దక్షిణాఫ్రికాతో జరిగిన టీ20 గేమ్‌లో ఫీల్డింగ్ చేస్తున్నప్పుడు సూర్యకుమార్ యాదవ్ తన చీలమండ ట్విస్ట్ కావడంతో సిరీస్ నుండి తప్పుకున్నాడు. సూర్యకుమార్ కోలుకోవడానికి ఆరు వారాలు పట్టవచ్చని భావిస్తున్నారు. కానీ హార్దిక్ కోలుకోవడానికి మరికొన్ని నెలలు పట్టేలా ఉంది.

హార్దిక్ తన చీలమండ గాయం నుండి ఇప్పట్లో కోలుకునే అవకాశాలు లేవని, దీంతో ఆఫ్ఘనిస్తాన్ సిరీస్‌ కు దూరం కావడమే కాకుండా, ఐపీఎల్ తాజా సీజన్ కు కూడా దూరమవుతాడని అంచనా వేస్తున్నట్లు పీటీఐ తాజా రిపోర్టులో తెలిపింది. హార్దిక్ ఫిట్‌నెస్ పై ప్రస్తుతానికి ఎటువంటి అప్‌డేట్ లేదని, ఐపిఎల్ ముగిసేలోపు అతను అందుబాటులో ఉంటాడనే పెద్ద ప్రశ్నగా మిగిలి ఉందని వెల్లడించింది.

హార్ధిక్ గాయం నుంచి కోలుకోకపోవడం ఇప్పుడు టీమిండియాకు, ముంబై ఇండియన్స్‌కు పెద్ద దెబ్బగా మారబోతోంది. జాతీయ జట్టును ఆఫ్ఘనిస్తాన్‌పై టీ20 టోర్నీలో ముందుండి నడిపించే ప్రయత్నంలో రోహిత్ శర్మను సెలక్టర్లు ఎంచుకునే అవకాశం ఉంది. అయితే భారత కెప్టెన్ మరికొన్నాళ్లు విశ్రాంతి కావాలని కోరుకుంటే ... దక్షిణాఫ్రికా టీ20 సిరీస్‌లో సూర్యకుమార్‌కు వైస్ కెప్టెన్‌గా ఎంపిక చేసిన రవీంద్ర జడేజాను ఎంపిక చేసే అవకాశం ఉంది.

English summary

team india all-rounder hardik pandya is almost ruled out of t20 series against afghanistan and ipl 2024, as per the latest reports.