సడన్ గా తప్పుకొన్న సిరాజ్: టీ20 టీమ్ నుంచి అవుట్: ఆ ప్లేయర్ కు చోటు
భారత టీ20 క్రికెట్ జట్టులో ఊహించని మార్పు చోటుచేసుకుంది. ఇంగ్లాండ్, ఐర్లాండ్ పర్యటనలకు సిద్ధమైన టీ20 జట్టు నుంచి ఫాస్ట్ బౌలర్ మహ్మద్ సిరాజ్ సడన్ గా తప్పుకొన్నాడు. దీనిపై బీసీసీఐ కొద్దిసేపటి కిందటే కీలక ప్రకటన చేసింది. రాబోయే ఐర్లాండ్, ఇంగ్లాండ్ టీ20 ఇంటర్నేషనల్స్ సిరీస్లకు సంబంధించి భారత జట్టులో స్వల్ప మార్పులు చోటు చేసుకున్నట్లు తెలిపింది. ఫాస్ట్ బౌలర్ మహ్మద్ సిరాజ్ ఈ సిరీస్ల నుంచి తప్పుకొన్నాడని వెల్లడించింది.
అతని స్థానంలో పేసర్ ప్రసిద్ధ్ కృష్ణను ఎంపిక చేసినట్లు సెలక్షన్ కమిటీ వెల్లడించింది. సుదీర్ఘ అంతర్జాతీయ సీజన్ను దృష్టిలో ఉంచుకుని, ఆటగాళ్ల పని ఒత్తిడి నిర్వహణలో భాగంగా ఈ నిర్ణయం తీసుకున్నట్లు బీసీసీఐ పేర్కొంది. బీసీసీఐ మెడికల్ టీమ్, టీమ్ మేనేజ్మెంట్ మధ్య జరిగిన సుదీర్ఘ చర్చల తర్వాతే ఈ మార్పు చేపట్టారు. మహ్మద్ సిరాజ్ పూర్తిస్థాయి ఫిట్నెస్తో తిరిగి రావాలనే ఉద్దేశంతో గడువు ఇవ్వడం, దీనిని ఒక ముందస్తు జాగ్రత్త చర్యగా బోర్డు అభివర్ణించింది.
బీసీసీఐ కార్యదర్శి దేవజిత్ సైకియా ఈ మేరకు అధికారిక ప్రకటన ద్వారా సమాచారాన్ని మీడియాకు అందజేశారు. ఇంగ్లండ్, ఐర్లాండ్ పర్యటనలకు ఎంపికైన జట్టులో యువ సంచలనం వైభవ్ సూర్యవంశీకి అవకాశం దక్కిన విషయం తెలిసిందే. ఐపీఎల్లో అతను ప్రదర్శించిన దూకుడు అతనిపై అంచనాలను భారీగా పెంచింది. ప్రత్యర్థి బౌలర్లను ఉతికి ఆరేసే సామర్థ్యం ఉన్న వైభవ్ ఎంపిక భారత జట్టులో కొత్త ఉత్సాహాన్ని నింపింది. అతని రాకతో జట్టు కూర్పు మరింత బలోపేతం కానుంది.
ఐపీఎల్లో రాణించిన పలువురు యువ ఆటగాళ్లకు కూడా ఈ పర్యటనలో అవకాశం కల్పించారు సెలెక్టర్లు. ఆసియా క్రీడల కోసం ఎంపిక చేసిన జట్టులో పేసర్ జస్ ప్రీత్ బుమ్రాను చేర్చడం మరో అంశం. బౌలింగ్ విభాగంలో అనుభవం, వేగం తోడవ్వడం జట్టుకు అదనపు బలం కానుంది. టీ20 ఫార్మాట్లో తదుపరి రెండు ప్రపంచకప్ సైకిళ్లను దృష్టిలో ఉంచుకుని, సెలెక్టర్లు అత్యంత సమతుల్యమైన జట్టును నిర్మించారు. ఈ క్రమంలో ఇషాన్ కిషన్, శివం దూబే వంటి ఆటగాళ్లు జట్టులో కీలక పాత్ర పోషించనున్నారు.
ఐర్లాండ్, ఇంగ్లాండ్ టీ20 సిరీస్ల కోసం ఖరారు చేసిన భారత జట్టు వివరాలు ఇలా ఉన్నాయి: శ్రేయస్ అయ్యర్ (కెప్టెన్), అభిషేక్ శర్మ, సంజూ శాంసన్ (వికెట్ కీపర్), ఇషాన్ కిషన్ (వికెట్ కీపర్), శివమ్ దూబే, తిలక్ వర్మ (వైస్ కెప్టెన్), నితీష్ కుమార్ రెడ్డి, అక్షర్ పటేల్, వాషింగ్టన్ సుందర్, వరుణ్ చక్రవర్తి, రవి బిష్ణోయ్, హర్షిత్ రాణా, అర్షదీప్ సింగ్, ప్రిన్స్ యాదవ్, వైభవ్ సూర్యవంశీ, ప్రసిద్ధ్ కృష్ణ జట్టులో చోటు దక్కించుకున్నారు.
Click it and Unblock the Notifications
Sign in with Google