చిరంజీవీ, 'మార్పు' ఇలా....

హైదరాబాద్: చిరంజీవి ప్రజారాజ్యం పార్టీ ప్రధాన నినాదాల్లో "మార్పు కోసం ప్రజారాజ్యం" అనేది ప్రధానమైనది. ఆయన సమాజంలో, రాజకీయాల్లో ఎటువంటి మార్పు తీసుకురాబోతున్నారో ఇంకా స్పష్టం కాలేదు కానీ జూబిలీహిల్స్ ప్రజలు మాత్రం ఒక మార్పు కోరుకుంటున్నారు. జూబిలీహిల్స్, కృష్ణానగర్ మధ్య కొత్తగా వెలిసిన ప్రజారాజ్యం పార్టీ ఆఫీసు వల్ల అక్కడ ఎంతో కాలంగా నివాసం ఉంటున్న పెద్ద మనుషులు ఇబ్బంది పడిపోతున్నారు. ప్రశాంతంగా ఉండే నివాస ప్రాంతాల నుంచి ప్రజారాజ్యం పార్టీ కార్యాలయాలను మార్చాలని వారు కోరుకుంటున్నారు. చిరంజీవి చెబుతున్న మార్పు ఇక్కడి నుంచే ప్రారంభం కావాలని వారి సూచన.

చిరంజీవి పార్టీకి జూబిలీహిల్స్ రోడ్ నెంబర్ 46 లో ఒక ఆఫీసు ఉంది. కృష్ణానగర్-జూబిలీహిల్స్ హద్దులో మరో కార్యాలయం ఉంది. నిత్యం వందలాది అభిమానులతో, టికెట్లు ఆశించేవారు వేసుకువచ్చే భారీ వాహనాలతో, బాణాసంచా పేలుళ్ళతో జూబిలీహిల్స్ లో ప్రశాంతంగా జీవిస్తున్న విఐపిలకు కంటి మీద కునుకు లేకుండా పోతోంది. "మా ప్రశాంతతకు భంగం కలుగుతోంది" అని ప్రజారాజ్యం పార్టీ ఉంటున్న డివి శివప్రసాద్ ఆవేదన వ్యక్తం చేస్తున్నారు. మరో ప్రజారాజ్యం ఆఫీసు వద్ద ఉంటున్న మాజీ ఎంపీ ఆర్ సురేందర్ రెడ్డి కూడా అదే అభిప్రాయం వ్యక్తం చేశారు. చిరంజీవిని కలిసి ఇబ్బందులను వివరించామని ఆయన చెప్పారు.

ఎన్నికల సమయం కావడంతో ప్రజారాజ్యం ఆఫీసుల వద్ద విపరీతమైన రద్దీ కనిపిస్తోంది. కార్యకర్తల నినాదాలు, కార్లలో నుంచి పార్టీ పాటలు, టపాసుల శబ్దాలు న్యూసెన్స్ లా తయారయ్యాయి. కానీ కార్యకర్తలు తమ మాట వినడం లేదని, ఏమీ చేయలేమని ప్రజారాజ్యం పార్టీ నాయకులు చేతులెత్తేస్తున్నారు.