ప్రజారాజ్యానికి పవనే ప్రాణమా?
నిజానికి కొంత మంది వామపక్ష నాయకులకు మందు తాగే అలవాటు ఉందేమో కానీ పవన్ కల్యాణ్ కు ఆ అలవాటు లేదని అన్ని రకాల వర్గాల కథనం. తమకు బలం ఉన్న ఖమ్మం జిల్లాలో పవన్ తమ పరువు తీశాడన్న అక్కసుతో బివి రాఘవులు అతడిని వ్యక్తిగతంగా కించపరిచే విధంగా వ్యాఖ్యానించడం మరిన్ని విమర్శలకు దారి తీస్తోంది. దీనితో అర్ధమయ్యేదేమిటయ్యా అంటే పవన్ తెలంగాణ జిల్లాల్లో కమ్యూనిస్టుల కోటలకు గండి కొడుతున్నాడని. ఆ సమాచారం రాకపోతే రాఘవులు అలా ప్రతిస్పందించే వారు కాదేమో.
పవన్ కల్యాణ్ ప్రచారం చిరంజీవి కంటే బాగా ఉందన్న అభిప్రాయం ఉంది. తనకున్న నాలెడ్జితో, ఎనర్జీతో పవన్ తెలంగాణ జిల్లాల్లో బ్రహ్మాండంగా రోడ్ షోలు నిర్వహిస్తున్నారు. ఇప్పుడు కాంగ్రెస్ ప్రభుత్వం దృష్టి, మహా కూటమి దృష్టి పవన్ కల్యాణ్ మీద పడింది. వివిధ వృత్తుల వారు తనకు కలిసినప్పుడు వాళ్ళతో కలిసి మాట్లాడుతూ, రకరకాలుగా వాళ్ళతో కలిసిపోతూ పవన్ చేస్తున్న విన్యాసాలు ఈ ఎన్నికల సమయంలో యువతీ యువకులను ఆకర్షిస్తున్నాయి.
నిజానికి చిరంజీవి పవన్ కల్యాణ్ నుంచి రాజకీయ ఉపన్యాస పాఠాలు నేర్చుకున్నట్టు కనిపిస్తోంది. గతంలో సౌమ్యంగా ప్రసంగాలు చేయడంతో చిరంజీవి సభల్లో పెద్దగా ప్రతిస్పందన కన్పించేది కాదు. ఎప్పుడైతే చిరంజీవి ఆ సత్యాన్ని గ్రహించారో ఆయన పవన్ కల్యాణ్ ను ఆదర్శంగా తీసుకుని ఆయనలా ఆవేశంగా ప్రసంగించడానికి ప్రయత్నిస్తున్నారు.