'శివ'కు 20 ఏళ్ళు!

హైదరాబాద్: రామ్ గోపాల్ వర్మ-నాగార్జునల బ్లాక్ బస్టర్ చిత్రం "శివ" విడుదలై నేటికి సరిగ్గా 20 సంవత్సరాలు. తెలుగు సినిమాకు సాంకేతిక విలువలతో పాటు స్పీడును తెచ్చి పెట్టి ప్రేక్షకులను కొత్త లోకాల్లో విహరింపజేసిన చిత్రమిది. బాలీవుడ్ కు షోలే ఎటువంటిదో టాలీవుడ్ కు శివ అటువంటిది. ఈ సినిమా పేద్ద హిట్ అవుతుందని అనుకున్నది ఇద్దరే. ఒకరు దర్శకుడు వర్మ, మరొకరు హీరో నాగార్జున. ఈ సినిమా గురించి ఇప్పుడు రామ్ గోపాల్ వర్మ ఏమంటున్నారో చదవండి.

"బ్రూస్‌ లీ 'రిటర్న్‌ ఆఫ్‌ ది డ్రాగన్‌" ఈ చిత్రానికి ప్రధాన ప్రేరణ. అలాగే ఈ చిత్రంలోని చాలా సన్నివేశాలను అనేక చిత్రాల ప్రేరణతోనే నేను రూపొందించాను. 'అర్జున్‌, అర్ధసత్య, కాలచక్ర" వంటి చిత్రాల స్ఫూర్తి 'శివ"పై చాలా ఉంది. అయితే, ఆయా చిత్రాలనుంచి నేను ప్రేరణ పొందానే తప్ప ఎక్కడా అనుకరణకు చోటివ్వలేదు. అలాగే ఈ చిత్రం విజయంలో సౌండ్‌ ఎఫెక్ట్‌‌ లు కీలకపాత్ర పోషించాయి. సౌండ్‌ ఎఫెక్ట్‌‌ లు జోడించడానికి ముందు ఈ చిత్రాన్ని చూసినవాళ్లంతా కచ్చితంగా ఫ్లాప్‌ అవుతుందనుకున్నారు. నిర్మాతలు సురేంద్ర, వెంకట్‌లు సైతం మహా అయితే ఈ చిత్రం యావరేజ్‌గా ఆడుతుందనుకున్నారు. నేను కాకుండా, ఈ చిత్రం తప్పకుండా విజయం సాధిస్తుందని నమ్మిన ఏకైక వ్యక్తి నాగార్జున. అయితే 20 సంవత్సరాల తర్వాత కూడా గుర్తుంచుకునేంత సంచలనం సృష్టిస్తుందని నేను కలలో కూడా అనుకోలేదు. బహుశా నాగార్జున కూడా అనుకుని ఉండరు!"

ఈ సినిమాకు సంబంధించిన వివరాలు:

విడుదల తేది: అక్టోబర్‌5, 1989

నిర్మాణం: యస్‌.యస్‌.క్రియేషన్స్‌-అన్నపూర్ణ స్టూడియోస్‌

తారాగణం: అక్కినేని నాగార్జున, అమల, రఘువరన్‌, సాయిచంద్‌, చక్రవర్తి(జెడి) శుభలేఖ సుధాకర్‌, తనికెళ్ల భరణి, ఉత్తేజ్‌, మురళీమోహన్‌, జితేంద్ర(చిన్నా) నరేష్‌(జగన్‌) కోట శ్రీనివాసరావు, గొల్లపూడి మారుతీరావు

సాంకేతికవర్గం: మాటలు: తనికెళ్ల భరణి, పాటలు: వేటూరి సుందరరామ్మూర్తి, సిరివెన్నెల సీతారామశాస్ర్తి, నేపధ్యగానం: బాలు, మనో, యస్‌.జానకి, చిత్ర, నృత్యాలు: సుందరం, కళ: తోట తరణి, ఛాయాగ్రహణం: యస్‌.గోపాల్‌రెడ్డి, సంగీతం: ఇళయరాజా, నిర్మాతలు: యార్గగడ్డ సురేంద్ర-వెంకట్‌ అక్కినేని, కథ, చిత్రానువాదం, దర్శకత్వం: రాంగోపాల్‌వర్మ.

రాంగోపాల్‌ వర్మను దర్శకుడిగా పరిచయం చేస్తూ రూపొందిన ఈ చిత్రం నాగార్జునకు 17వది. 55 రోజుల్లో పాటలు సహా షూటింగ్‌ పూర్తి చేసుకున్న ఈ చిత్రానికయిన ఖర్చు 85 లక్షలు. ఈ చిత్రానికి దర్శకత్వం వహించినందుకు పారితోషికంగా 50,000 రూ.లతోపాటు లాభాల్లో 5 శాతం అందుకున్న రాంగోపాల్‌ వర్మ 'బెస్ట్‌ డెబ్యూ డైరక్టర్‌"గానే కాకుండా 'బెస్ట్‌ డైరక్టర్‌"గానూ ఆ సంవత్సరానికి రాష్ట్ర ప్రభుత్వం నుంచి నంది అవార్డులు పొందారు. మూసకు విరుద్ధంగా రూపొందిన ఈ చిత్రం సరిగ్గా అడదేమోనన్న భయం నిర్మాతల్లో ఉండేది. అయినా ఈ చిత్రం అనూహ్యంగా ప్రేక్షకుల ఆదరణ పొంది అప్పట్లోనే ఒక్క నైజాంలోనే కోటి రూపాయలకు పైగా వసూలు చేసి చరిత్ర సృష్టించింది. అలాగే విడుదలకు ముందు ఈ చిత్రం తమిళ డబ్బింగ్‌ రైట్స్‌ అమ్మాలని చూస్తే లక్ష రూపాయలకంటె ఒక్క రూపాయి కూడా ఎక్కువ ఇవ్వడానికి ఎవరూ ముందుకు రాలేదు. విడుదలయ్యాక ఈ చిత్రం తమిళ డబ్బింగ్‌ రైట్స్‌కు 85 క్షలు పలకడం విశేషం. 'ఇదయం" పేరుతో తమిళంలో అనువాదమైన ఈ చిత్రం అక్కడ 2 కోట్లకు పైగా వసూలు చేసింది.