హైదరాబాద్ పేచీ: కెసిఆర్ వ్యూహం

తెలంగాణ రాష్ట్ర ఏర్పాటులో హైదరాబాదు మాత్రమే పేచీగా మారే అవకాశాలున్నాయి. హైదరాబాదు వల్లనే సీమాంధ్ర నాయకులు తెలంగాణ రాష్ట్ర ఏర్పాటును వ్యతిరేకిస్తున్నారనే అభిప్రాయం బలంగా ఉంది. అందులో నిజం లేకపోలేదు. రాజకీయ నాయకులుగా మారిన సీమాంధ్ర పారిశ్రామికవేత్తలు హైదరాబాదులో పెద్ద యెత్తున పెట్టుబడులు పెట్టారు. ప్రభుత్వంలో భాగమై హైదరాబాదు చుట్టుపక్కల వేలాది ఎకరాలను హస్తగతం చేసుకున్నారు. వివిధ పరిశ్రమల స్థాపన కన్నా రియల్ ఎస్టేట్ వ్యాపారమే దివంగత నేత వైయస్ రాజశేఖర రెడ్డి అధికారంలోకి వచ్చిన తర్వాత వారికి ప్రధానంగా మారింది. ప్రాజెక్టుల పేరుతో భూములను సొంతం చేసుకుని రియల్ ఎస్టేట్ వ్యాపారాలు నడిపారు. అందుకు నిబంధనల ఉల్లంఘన కూడా జరిగింది. వివిధ రూపాల్లో ప్రభుత్వ భూములనే కాకుండా పేద రైతుల భూములను కూడా తమ ఆధీనంలోకి తెచ్చుకున్నారు. తెలంగాణ రాష్ట్రం ఏర్పడితే ఆ గుట్టంతా బయటకు వచ్చే ప్రమాదం ఉంది. అంతేకాకుండా తెలంగాణ రాష్ట్రంలో ప్రభుత్వం తమ చెప్పుచేతల్లో ఉంటుందనే గ్యారంటీ కూడా సీమాంధ్ర నాయకులకు లేదు. దీంతో వారు హైదరాబాదు కోసం తెలంగాణ రాష్ట్రం ఏర్పాటును అడ్డుకుంటున్నారు.

శ్రీకృష్ణ కమిటీ నివేదికలో హైదరాబాదు ఓ ప్రధానాంశంగా మారే అవకాశం ఉంది. తెలంగాణ రాష్ట్రం ఏర్పాటు చేస్తే దాన్ని కేంద్ర పాలిత ప్రాంతంగా చేయాలనే డిమాండ్ కూడా బలంగా ఉంది. అయితే, తెలంగాణ నాయకులు, మేధావులు మాత్రం దాన్ని వ్యతిరేకిస్తున్నారు. హైదరాబాదు తెలంగాణలో వందలాది ఏళ్లుగా భాగమని, దాన్ని చారిత్రకంగా, సామాజికంగా తెలంగాణ నుంచి వేరు చేయడం కుదరదని, హైదరాబాదు తెలంగాణకు తల లాంటిదని, తల లేని మొండెం ఉండదని వారంటున్నారు. ఈ స్థితిలో సీమాంధ్ర నాయకుల అభిప్రాయాన్ని పసిగట్టిన తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు తనదైన వ్యూహరచన చేసి దాన్ని అమలులో పెడుతున్నారు. సీమాంధ్ర నాయకులు హైదరాబాదులో ఉండడం సాధ్యం కాదని అనుకునేలా కార్యక్రమాలను చేపడుతున్నారు.

హైదరాబాదు, హైదరాబాదు పరిసర ప్రాంతాల్లో కార్యక్రమాలను ఉధృతం చేశారు. ఉస్మానియా విశ్వవిద్యాలయం మాత్రమే కాకుండా రాష్ట్ర హైకోర్టును కూడా దానికి కేంద్రంగా మార్చారు. సీమాంధ్ర వర్గాలు హైదరాబాదు కూడా తమది కాదని, ఇక్కడ ఉండడం సాధ్యం కాదని అనుకునే విధంగా కార్యక్రమాలు చేపడుతున్నారు. ఉస్మానియా విశ్వవిద్యాలయం పూర్తిగా తెలంగాణ ఆందోళనకు కేంద్రంగా మారింది. న్యాయవాదులు కూడా హైదరాబాదులోని హైకోర్టును తెలంగాణ ఉద్యమానికి ఒక కేంద్రంగా మార్చారు. సీమాంధ్రకు చెందిన హైదరాబాదులోని కార్పొరేట్ కళాశాలల యాజమాన్యాలు దాదాపుగా కెసిఆర్ చెప్పుచేతల్లోకి వచ్చినట్లు భావిస్తున్నారు. రాజకీయాలతో సంబంధం లేని పారిశ్రామికవేత్తలు, సంస్థల యాజమాన్యాలు కూడా ఓ అవగాహనకు వచ్చినట్లు సమాచారం. కేవలం సీమాంధ్రకు చెందన పారిశ్రామికవేత్తలైన రాజకీయ నాయకులతోనే కెసిఆర్ కు సమస్యగా ఉంది. దీంతో సీమాంధ్ర రాజకీయ నాయకుల గొంతు మైనారిటీలో పడేలా ఆయన వ్యవహరిస్తున్నారు. శ్రీకృష్ణ కమిటీ నివేదిక ఇచ్చేలోగా హైదరాబాదుపై తన పట్టు సాధించాలనేది ఆయన వ్యూహంగా కనిపిస్తోంది.