రాష్ట్రపతి పాలన దిశగా రాష్ట్రం?

ఆంధ్రప్రదేశ్ రాష్ట్ర పరిస్థితులు రాష్ట్రపతి పాలన దిశగా సాగుతున్నట్లు ఊహాగానాలు చెలరేగుతున్నాయి. తెలంగాణ, సీమాంధ్ర ఉద్యమాలతో పాటు కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర వంటి పలు అంశాలు రాష్ట్రాన్ని రాష్ట్రపతి పాలన దిశగా నడిపిస్తున్నట్లు అనుమానాలు వ్యక్తమవుతున్నాయి. శ్రీకృష్ణ కమిటీ డిసెంబర్ 31వ తేదీ లోగా నివేదిక సమర్పించునుంది. ఈ నివేదిక అందేలోగానే రాష్ట్రపతి పాలన విధించి పరిస్థితిని తమ చెప్పుచేతుల్లోకి తీసుకోవాలని కాంగ్రెసు అధిష్టానం ఆలోచిస్తున్నట్లు ప్రచారం జరుగుతోంది. ఓ వైపు వైయస్ ధిక్కార స్వరం వినిపిస్తూ ఓదార్పు యాత్ర చేపట్టడం కాంగ్రెసు అధిష్టానానికి తలనొప్పిగా ఉంది. ఇదే సమయంలో తెలంగాణ రాష్ట్ర ఏర్పాటు ఉద్యమం అదుపు తప్పుతున్న సూచనలు కనిపిస్తున్నట్లు కాంగ్రెసు భావిస్తోంది.

రాష్ట్ర పరిస్థితిపై రాష్ట్ర గవర్నర్ నరసింహన్ ఎప్పటికప్పుడు కేంద్రానికి నివేదిక సమర్పిస్తున్నారు. నిఘా విభాగాలు కూడా క్రమం తప్పకుండా కేంద్రానికి నివేదికలు సమర్పిస్తూనే ఉన్నాయి. కమిటీ నివేదిక రాక ముందు నుంచే రాష్ట్రంలో ఆందోళనకర పరిస్థితులు నెలకొంటున్నాయి. కమిటీ నివేదిక సూచన ఏదైనా రాష్ట్రం పూర్తిగా అల్లకల్లోలంగా మారే సూచనలున్నాయని అంటున్నారు. కమిటీ సూచనను బట్టి సీమాంధ్రలోనో, తెలంగాణలోనో తీవ్రమైన ఆందోళనలు చెలరేగవచ్చునని అంచనాలు వేస్తున్నారు.

కాంగ్రెసు పార్లమెంటు సభ్యుడు వైయస్ జగన్ వరంగల్ జిల్లా ఓదార్పు యాత్రను అడ్డుకోవడం నుంచి మొదలు పెడితే తాజాగా మంత్రి శిల్పా మోహన్ రెడ్డిపై కరీంనగర్ జిల్లాలో రాళ్లదాడి జరగడం వరకు అన్నీ కేంద్ర ప్రభుత్వ దృష్టికి వెంటవెంటనే వెళ్తున్నట్లు చెబుతున్నారు. మహబూబ్ నగర్ జిల్లా తెలుగుదేశం పార్టీ అధ్యక్షుడు నారా చంద్రబాబు నాయుడిపై దాడి, ఎపిపిఎస్సీ గ్రూప్ వన్ ప్రిలిమినరీ పరీక్ష గందరగోళం, తెలంగాణ న్యాయవాదుల ఆందోళన వంటి అన్ని పరిస్థితులను కేంద్ర ప్రభుత్వంతో పాటు కాంగ్రెసు పార్టీ అధిష్టానం జాగ్రత్తగా గమనిస్తున్నట్లు చెబుతున్నారు. పరిస్థితిని అదుపులో ఉంచుకోవడానికి శ్రీకృష్ణ కమిటీ నివేదిక అందడానికి ముందే రాష్ట్రంలో రాష్ట్రపతి పాలన విధించే అవకాశాలు లేకపోలేదనే అభిప్రాయం వ్యక్తమవుతోంది.