ఉక్కు మనిషిగా ముందుకెళ్తున్న రోశయ్య

హైదరాబాద్: అధిష్టానవర్గం తనకు ఇచ్చిన అవకాశాన్ని ముఖ్యమంత్రి రోశయ్య చక్కగా వినియోగించుకుంటున్నారు. ఆయన నోరు గుంటూరు కొరివికారం అంత ఘాటుగా ఉంటుంది. స్పష్టత ఆయన ప్రత్యేకత. తన స్పష్టమైన ప్రసంగాలతో ఆయన ఎంతో మంది ముఖ్యమంత్రులకు ఉక్కు కవచంలా పనికి వచ్చారు. ఏ రోజుకారోజు ఠంచన్ గా హైకమాండ్ కు రిపోర్టులు పంపిస్తున్నారు. పాత బస్తీ అల్లర్లు, పర్యటనల పేరుతో జగన్ బాబు చేస్తున్న అల్లరి గురించి ఆయన సోనియమ్మకు రోజూ ఏకరవు పెడుతున్నట్టు సమాచారం. త్వరలో మంత్రివర్గ విస్తరణకు అనుమతి ఇవ్వమని ఆయన కోరినట్టు, ముందు రాష్ట్రంలో శాంతి భద్రతలను కాపాడమని ఆమె సూచించినట్టు సమాచారం.

ఇప్పుడున్న మంత్రుల్లో కనీసం ఆరుగురుని తొలగించి, కొత్తగా 16 మంది మంత్రులను తీసుకోడానికి రోశయ్య గేమ్ ప్లాన్ వేసినట్టు తెలుస్తోంది. ఆయనకు సన్నిహితులైన వారు ఈ పథకాన్ని రచించి రోశయ్యతో చర్చిస్తున్నట్టు సమాచారం. ఏప్రిల్ 2 నుంచి జగన్ తన తండ్రి వైఎస్ కోసం ప్రాణాలు అర్పించిన కుటుంబాల కోసం "ఓదార్పు" యాత్ర నిర్వహించబోతున్నారు. అందుకు హైకమాండ్ అనుమతి కోరినా ఇప్పటి వరకు జవాబు లేదు. రోశయ్యకు జగన్ చెవిలో జోరీగలాగా, కంట్లో నలుసులాగా పరిణమించారు. అయితే జగన్ శిబిరంలో రోశయ్య శిబిరంలో కంటే తలపండిన మేధావులు ఉన్నారు. అధికారంలోకి వచ్చి ఆరు నెలలు కావస్తున్నా రోశయ్య మంచి సలహాదారులను పెట్టుకోలేకపోయారు. ఆయన "దైవాధీనం- మోటారు సర్వీసు" లా ప్రభుత్వ బండిని లాగిస్తున్నారు.

మంత్రివర్గ పునర్ వ్యవస్ధీకరణ జరిగిన తర్వాత రోశయ్య సూపర్ మ్యాన్ గా ఆవిర్భవించవచ్చు. అందుకే అసలు మంత్రివర్గ విస్తరణ జరగకుండా జగన్, జగన్ యాత్రలు జరగనివ్వకుండా రోశయ్య వ్యూహాలు వేసుకుంటున్నారు. అంత పెద్ద మనిషితో పెట్టుకోకుండా గౌరవంగా ఉండాలన్న మంచి బుద్ధి జగన్ కు లేదు. ఇంత చిన్న పిల్లాడిని ఆడుకోనివ్వాలి కానీ అడ్డుకోకూడదన్న పెద్ద బుద్ధి రోశయ్యకు లేదు. రాష్ట్రంలో రోశయ్య, జగన్ తప్ప మరో నాయకుడు లేడన్న పరిస్ధితి నెలకొంది. ఈ పోరులో ఏ డిఎస్ లాంటి వారో ముఖ్యమంత్రి పదవిని ఎగరేసుకుపోయే అవకాశాలు లేకపోలేదు.