వైయస్ జగన్ కు కరపత్రం బెడద

పులివెందులలో మంత్రి వైయస్ వివేకానంద ఏర్పాటు చేసిన సమావేశంలో మాజీ పార్లమెంటు సభ్యుడు వైయస్ జగన్ కు వ్యతిరేకంగా ప్రజా పరిరక్షణ సమితి పేరుతో పంచిన కరపత్రాలపై ఇప్పుడు సర్వత్రా చర్చ జరుగుతోంది. ఆ కరపత్రంలో మూడు విషయాలపై ముఖ్యంగా వివరణ ఇచ్చారు. ఒకటి కాంగ్రెస్ ఓదార్పు యాత్రకు అడ్డు పడ్డుపడ్డారనే విషయంపై, సోనియా అపాయింట్ మెంటు విషయం రెండోది, బాబాయ్ వివేకానందకు మంత్రి పదవి ఇవ్వడం మూడోది - ఈ మూడు విషయాలపై జగన్ విమర్శలకు సమాధానాలు ఇస్తూ ఈ కరపత్రం విడుదలైంది.

వైయస్ కుటుంబంలో ఐక్యత కోసం వివేకానంద ఎంతో త్యాగం చేశారని ఆ కరపత్రంలో పేర్కొన్నారు. జగన్ కోసం వివేకానంద పార్లమెంటు సభ్యత్వాన్ని వదులుకున్నారన్నారు. వైయస్ కుటుంబంలో జగన్ కు తప్ప ఎవరికి పదవి ఇచ్చినా కుటుంబాన్ని చీల్చడమే ఆయన ఉద్దేశ్యమా అని ప్రశ్నించారు. వైయస్ వివేకానందకు ఒక్కరోజులోనే ఏఐసిసి అధ్యక్షురాలు సోనియాగాంధీ అపాయింట్ మెంటు ఇచ్చిందనడంలో వాస్తవం లేదని, అయితే పులివెందుల ఉప ఎన్నికలకు ముందు సోనియాగాంధీ దివంగత వైయస్ సతీమణి విజయలక్ష్మికి ఒక్కరోజులోనే అపాయింట్ మెంటు ఇచ్చారన్నారు. ఆయా సందర్భాల్లో వచ్చిన పరిస్థితిని బట్టి సోనియా అపాయింట్ మెంటు ఇస్తుందన్నారు.

జగన్ ముఖ్యమంత్రి కావాలని అనుకోవటంలో తప్పులేదని, అయితే ఆయనకు మరింత రాజకీయ అనుభవం అవసమరమని చెప్పారు. కాంగ్రెస్ అధిష్టానం ఓదార్పును వద్దని చెప్పలేదన్నారు. అయితే దానిని రాజకీయ వేడుకగా మాత్రమే మార్చవద్దని చెప్పారు. వైయస్ కుటుంబంలో జగన్ కు తప్ప మరెవరికీ పదవి వచ్చినా కుటుంబాన్ని చీల్చుతారా అని ప్రశ్నించారు. దివంగత ముఖ్యమంత్రి వైయస్ రాజశేఖరరెడ్డి మీద అభిమానంతో మంత్రులు, శాసనసభ్యులు వైయస్ మృతి తర్వాత జగన్ ను ముఖ్యమంత్రిని చేయాలని సంతకాలు చేశారని పేర్కొన్నారు. తండ్రి మృతి చెందిన తర్వాత పార్టీని అస్థిర పరచడానికి జగన్ ప్రయత్నాలు చేశారన్నారు.

ఎంపీగా గెలిచిన తర్వాత ఒక్కసారి నియోజకవర్గంలో పర్యటించకపోవటం, సమావేశాలు ఏర్పాటు చేయక పోవటంతో జగన్ పార్టీలో ఉండి మళ్లీ అధికారంలోకి తెచ్చిన ఫలితం ఉండదని ఆ లేఖలో అభిప్రాయపడ్డారు. తాను ఆశించిన ముఖ్యమంత్రి పదవి రాలేదనే, తాను అనుకున్న తీరులో ఓదార్పు జరగనివ్వలేదని జగన్ రాజీనామా చేశారని ఉంది. చివరలో నిగర్వి, ప్రజా సంక్షేమం పట్ల నిబద్దత కలిగిన వివేకానందను అందరూ బలపర్చాలని అందులో పేర్కొన్నారు.