సీనియర్లపై చంద్రబాబు సీరియస్

తెలుగుదేశం పార్టీ అధ్యక్షుడు నారా చంద్రబాబు నాయుడు సీనియర్ నాయకుల తీరును సరి చేసేందుకు నడుం బిగించినట్లు తెలుస్తోంది. పార్టీని నిర్లక్ష్యం చేస్తూ సొంత పనులకు చాలా మంది సీనియర్ నాయకులు ప్రాధాన్యం ఇస్తున్నారనే అభిప్రాయంతో ఆయన తీవ్ర ఆగ్రహంతో ఉన్నట్లు తెలుస్తోంది. దీంతో గత రెండు మూడు రోజులుగా ఆయన సీనియర్ నాయకులతో సమావేశమై వారికి క్లాసులు పీకుతున్నట్లు చెబుతున్నారు. సీనియర్ నాయకులు పార్టీ కార్యాలయానికి పరిమితమై మీడియా సమావేశాలు ఏర్పాటు చేయడానికే పరిమితమవుతున్నారని, ప్రజల్లోకి వెళ్లడం లేదని ఆయన అభిప్రాయపడుతున్నారట.

పార్టీని ప్రజల్లోకి తీసుకుని వెళ్లడానికి సీనియర్ నాయకులు విఫలమవుతున్న నేపథ్యంలో ఆయన పరిస్థితిని సమీక్షిస్తున్నట్లు తెలుస్తోంది. సొంత పనులకు ప్రాధాన్యం తగ్గించి, పార్టీ కోసం పనిచేయకపోతే తీవ్ర పరిణామాలు ఉంటాయని చంద్రబాబు సీనియర్లకు ఆయన హెచ్చరికలు కూడా జారీ చేశారని చెబుతున్నారు. పార్టీలో ఉంటే ఉండండి, పోతే పొండి అని కూడా ఆయన చెబుతున్నారని వార్తలు వచ్చాయి.

పార్టీ మహానాడు నుంచి చంద్రబాబు పూర్తిగా మారిపోయారని, పార్టీని గాడిలో పెట్టడానికి ప్రయత్నిస్తున్నారని, అందుకే సీనియర్ల పట్ల కటువుగా వ్యవహరిస్తున్నారని చెబుతున్నారు. అయితే, చంద్రబాబు మారిపోయారనే వార్తల్లో నిజం లేదని చెప్పవచ్చు. సీనియర్లకు క్లాస్ పీకినట్లు వార్తలు వచ్చిన వెంటనే అది నిజం కాదంటూ పార్టీ కార్యాలయం నుంచి ఓ ప్రకటన విడుదలైంది. ఇలాంటి ప్రకటన వెలువడడం వెనక కూడా పార్టీ సీనియర్ల ఒత్తిడే ఉందని అంటున్నారు. దీన్ని బట్టి చంద్రబాబు ప్రయత్నాలు బూడిదలో పోసిన పన్నీరవుతున్నాయని అర్థం చేసుకోవచ్చు.

English summary

It is said TDP president N Chandrababu Naidu is serious on party senior leaders attitude.