వేటుకు ముందే జగన్ ఉప ఎన్నికల ప్రచారం!

వైయస్సార్ కాంగ్రెసు పార్టీ అధ్యక్షుడు, కడప పార్లమెంటు సభ్యుడు వైయస్ జగన్మోహన్ రెడ్డి అప్పుడే ఉప ఎన్నికల ప్రచారం ప్రారంభించారు. కిరణ్ కుమార్ రెడ్డి ప్రభుత్వంపై తెలుగుదేశం పార్టీ ప్రవేశ పెట్టిన అవిశ్వాస తీర్మానానికి జగన్ వర్గానికి చెందిన పదిహేడు మంది ఎమ్మెల్యేలు అనుకూలంగా ఓటు వేసిన విషయం తెలిసిందే. వారిపై ఓటు వేయడానికి కాంగ్రెసు పార్టీ ఓ వైపు తర్జన భర్జన పడుతుండగా జగన్ మాత్రం అప్పుడే ఎన్నికల ప్రచారం ప్రారంభించినట్లుగా కనిపిస్తోంది. విప్‌ను ధిక్కరిస్తూ ప్రభుత్వానికి వ్యతిరేకంగా ఓటు వేసిన వారిపై చర్యలు తీసుకోకుంటే కాంగ్రెసు విశ్వసనీయత కోల్పోతుంది, వేటు వేస్తే ఉప ఎన్నికలకు సిద్ధం కావాల్సి ఉంటుంది. ఈ నేపథ్యంలో దాదాపు వేటు వేసేందుకే అధిష్టానం మొగ్గు చూపే అవకాశాలు కనిపిస్తున్నాయి. అంతేకాదు, జగన్ ఆయన వర్గం నేతలు కూడా దమ్ముంటే అందరిపై వేటు వేయాలని సవాళ్లు విసురుతున్నారు. ఈ నేపథ్యంలో విప్‌ను బేఖాతరు చేసిన ఎమ్మెల్యేలపై వేటు వేసేందుకే కాంగ్రెసు నిర్ణయం తీసుకునే అవకాశాలు ఎక్కువ.

ఎలాగూ ఉప ఎన్నికలు వస్తాయని భావిస్తున్న జగన్ కాంగ్రెసు, టిడిపి కంటే ముందుగానే తన ఓదార్పులోనే ఉప ఎన్నికల ప్రచారం ప్రారంభించారు. గురువారం గుంటూరు జిల్లా ఓదార్పు యాత్రలో పాల్గొన్న జగన్ ప్రాంతాల కోసం కుర్చీ కోసం ఉప ఎన్నికలు రావడం చూశామని, రాష్ట్ర చరిత్రలోనే కాదు కదా బహుశా దేశ చరిత్రలోనే కనీవినీ ఎరుగని విధంగా పేదవాని కోసం, రైతుల కోసం ఉప ఎన్నికలు రావడం మొట్టమొదటిసారిగా ఇప్పుడే చూస్తున్నామని, రైతులు, రైతు కూలీలు, ప్రతి పేదవాడి కోసం, విశ్వసనీయత, విలువల కోసం నిలబడి పదవులను త్యాగం చేసిన ప్రతి ఎమ్మెల్యేను ఆశీర్వదించండని కోరారు. ఉప ఎన్నికలతో ప్రజల్లోకి వెళ్లి, రాష్ట్రంలో రైతన్నలు పెడుతున్న కన్నీళ్లను, ప్రతి పేదవాడి కష్టాలను ఢిల్లీ పెద్దలకు వినిపిస్తామని చెప్పారు. తనతో వస్తున్న ఎమ్మెల్యేలను ఐదుకో, ఆరుకో కట్టడి చేయాలని బాబు, కిరణ్ చూశారని కాని వారికి బుద్ధి వచ్చేలా దేవుడు చూసుకుంటాడని చెప్పారు. జగన్ మాటలు చూస్తుంటే వేటు పడక ముందే ఉపఎన్నికల ప్రచారం ప్రారంభించినట్లుగా కనిపిస్తోంది.

English summary

YSR Congress Party chief YS Jaganmohan Reddy started by poll campaigning in his odarpu yatra.