జగన్ పార్టీలోకి రెడ్డి బ్రదర్స్?

కర్ణాటక రాజకీయాల్లో చెల్లని నాణేలుగా మారిన గాలి జనార్దన్ రెడ్డి సోదరులు వైయస్ జగన్ నాయకత్వంలోని వైయస్సార్ కాంగ్రెసు పార్టీలో చేరుతారనే వదంతులు ఊపందుకున్నాయి. వారు బిజెపి నుంచి తప్పుకుని వైయస్ జగన్‌కు బాసటగా వైయస్సార్ కాంగ్రెసులోకి వస్తారని అంటున్నారు. వారు వైయస్ రాజశేఖర రెడ్డి కుటుంబానికి అత్యంత సన్నిహితులు. తనకు ఇతోధికంగా సాయపడిన వైయస్సార్ కుటుంబాన్ని ఆదుకోవడం తమ బాధ్యతగా కూడా వారు భావిస్తున్నట్లు సమాచారం. లోకాయుక్త తప్పు పట్టడంతో గాలి సోదరులకు కర్ణాటక ముఖ్యమంత్రి సదానంద గౌడ మంత్రివర్గంలో చోటు దక్కలేదు. ఇక దక్కుతుందనే ఆశలు కూడా లేవు.

బిజెపి అగ్రనాయకత్వం గాలి సోదరులను దూరం పెట్టాలనే నిర్ణయానికి వచ్చినట్లు తెలుస్తోంది. బిజెపి నేత సుష్మా స్వరాజ్‌ను గాలి బ్రదర్స్ తమ మాతగా చెప్పుకున్నారు. ఇప్పుడు ఆమె కూడా వారిని దూరం పెట్టారు. గాలి సోదరులతో తనకు ఏ విధమైన సంబంధం లేదని ఆమె గతంలో ఓసారి చెప్పారు. బళ్లారిలో గాలి సోదరులు సత్తా చాటుతున్నప్పటి నుంచి - అంటే 1999 నుంచి యేటా సుష్మా స్వరాజ్ బళ్లారి సందర్శిస్తూ వచ్చారు. వరలక్ష్మి వ్రతానికి ఆమె ఏటా హాజరయ్యేవారు. అయితే, తన మామ మరణించడంతో 2008 మాత్రం సుష్మా స్వరాజ్ బళ్లారి రాలేదు. ఈ నెల 12వ తేదీన జరిగిన వరలక్ష్మి వ్రతానికి మాత్రం ఉద్దేశ్యపూర్వకంగానే రాలేదు. అయితే, గాలి బ్రదర్స్ ఆంధ్రకు వస్తారా, కర్ణాటకలో వైయస్సార్ కాంగ్రెసు శాఖను ఏర్పాటు చేస్తారా అనేది తేలడం లేదు.

English summary

Will Reddy brothers of Karnataka – Gali Janardhan Reddy and Gali Karunakar Reddy, join dump the Bharatiya Janata Party and jump into the YSR Congress party floated by Kadapa MP Y S Jaganmohan Reddy?