భూకబ్జా వివాదంలో సబితా ఇంద్రారెడ్డి కుమారుడు?

By Pratap

Published: Tuesday, February 28, 2012, 10:16 [IST]

రాష్ట్ర హోం మంత్రి సబితా ఇంద్రా రెడ్డి తనయుడు భూకబ్జా వివాదంలో చిక్కుకున్నాడు. మియాపూర్‌లోని ఓ భూవివాదం కేసులో అతను జోక్యం చేసుకున్నట్లు వార్తలు వచ్చాయి. దీనిపై విచారణ జరిపించాలని సబితా ఇంద్రా రెడ్డి సైబరాబాద్ పోలీసు కమిషనర్‌ను ఆదేశించారు. సబితా ఇంద్రా రెడ్డి కుమారుడిపై హైదరాబాదులోని ఎర్రగడ్డకు చెందిన మొయినుద్దీన్ అనే రియల్టర్ కూకట్‌పల్లి ఎసిపి పివి పద్మజకు ఫిర్యాదు చేశాడు. తన ప్రత్యర్థుల అనుచరులు నారాయణ రావు, విఠల్ రెడ్డి, అబ్దుల గని, వికృతం తన భూమిలోకి బలవంతంగా చొరబడ్డారని అతను ఆరోపించాడు. మియాపూర్‌లోని 1.08 ఎకరాల భూమిపై ఇరు వర్గాలు ఇంతకు ముందు కోర్టుకు వెళ్లాయి. దాంతో యథాతథ స్థితిని కొనసాగించాలని హైకోర్టు ఆదేశించింది.

ఎర్త్ మూవర్‌తో దాదాపు 30 మంది తన భూమిలోకి చొరబడి కూల్చివేత కార్యక్రమం చేపట్టారని మొయినుద్దీన్ ఆరోపించాడు. తాము కేసు నమోదు చేశామని ఎసిపి చెప్పారు. నిందితులను గుర్తించాల్సి ఉందని చెప్పారు. అయితే, భూమిలోని భవనాల కూల్చివేతలో హోం మంత్రి సబితా ఇంద్రా రెడ్డి కుమారుడు కార్తిక్ రెడ్డి ప్రమేయం ఉందంటూ కొన్ని తెలుగు టీవి చానెళ్లు ఆరోపిస్తూ సోమవారం వార్తాకథనాలను ప్రసారం చేశాయి. తన మిత్రుడికి సాయపడుతున్నానని కార్తిక్ రెడ్డి చెప్పినట్లు మొయినుద్దీన్ టీవీ చానెళ్లతో చెప్పాడు. ఈ సంఘటనపై సమగ్ర దర్యాప్తు జరిపించి, తప్పు చేసినవారిపై చర్యలు తీసుకోవాలని సబితా ఇంద్రా రెడ్డి సైబరాబాద్ పోలీసు కమిషనర్ ద్వారకా తిరుమల రావును ఆదేశించారు. అయితే, మొయినుద్దీన్ ఇచ్చిన ఫిర్యాదులో కార్తిక్ రెడ్డి పేరు గానీ, ఆయన అనుచరుల పేర్లు గానీ లేవని పోలీసులు చెప్పారు.

Published On February 28, 2012