తెలంగాణలో మళ్లీ టీఆర్ఎస్.. కేసీఆర్కు బిగ్ షాక్!
తెలంగాణ రాజకీయాల్లో అనూహ్య మార్పులు చోటుచేసుకున్నాయి. కల్వకుంట్ల కవిత కొత్త రాజకీయ పార్టీని ప్రకటించి అందరినీ ఆశ్చర్యపరిచారు. తన పార్టీకి టీఆర్ఎస్ (తెలంగాణ రాష్ట్ర సేన) అని పేరు పెట్టినట్లు కవిత అధికారికంగా వెల్లడించారు. శనివారం మేడ్చల్ జిల్లా మునీరాబాద్లో జరిగిన భారీ బహిరంగ సభను పార్టీ ఆవిర్భావ సభగా నిర్వహించి.. ఈ నూతన ప్రస్థానానికి శ్రీకారం చుట్టారు. గతంలో ఉన్న టీఆర్ఎస్ (తెలంగాణ రాష్ట్ర సమితి) పేరును పోలి ఉండటం ఇప్పుడు రాజకీయ వర్గాల్లో హాట్ టాపిక్గా మారింది.
మునీరాబాద్లో భారీ ఆవిర్భావ సభ
పార్టీ ప్రకటన నేపథ్యంలో మేడ్చల్ జిల్లాలోని ఓఆర్ఆర్ సమీపంలో ఉన్న అద్వయ కన్వెన్షన్ ప్రాంతం జనసంద్రంగా మారింది. ఈ సభకు మహిళలు అత్యంత భారీ సంఖ్యలో తరలిరావడం విశేషం. సభా ప్రాంగణానికి చేరుకున్న కవిత.. కార్యకర్తలు, అభిమానుల కోలాహలం మధ్య అందరికీ అభివాదం చేస్తూ వేదికపైకి వచ్చారు. మహిళా సాధికారత, తెలంగాణ హక్కులే లక్ష్యంగా ఈ పార్టీ పనిచేయబోతోందని ఆమె తన రాకతోనే సంకేతాలిచ్చారు.
జెండా ఆవిష్కరణ, నివాళులు
వేదికపై పార్టీ పేరును ప్రకటించిన వెంటనే, కవిత తన పార్టీ జెండాను ఆవిష్కరించారు. ఈ సందర్భంగా ఆమె అనుచరులు, అభిమానులు పెద్ద పెట్టున నినాదాలు చేస్తూ ప్రాంగణాన్ని హోరెత్తించారు. ఈ రాజకీయ ప్రకటనకు ముందే కవిత ఎంతో ప్రాధాన్యత ఉన్న గన్ పార్క్ వద్దకు వెళ్లి అమరవీరుల స్థూపానికి నివాళులర్పించారు. అమరవీరుల సాక్షిగా తెలంగాణ సంక్షేమం కోసమే ఈ కొత్త పార్టీని స్థాపిస్తున్నట్లు ఆమె స్పష్టం చేశారు.
రాజకీయ సమీకరణాల్లో మార్పులు?
కవిత కొత్త పార్టీ ప్రకటన కేసీఆర్కు, బీఆర్ఎస్ పార్టీకి రాజకీయంగా పెద్ద దెబ్బ అనే విశ్లేషణలు వినిపిస్తున్నాయి. ఇప్పటికే పార్టీని వీడుతున్న నేతల సంఖ్య పెరుగుతుండగా.. ఇప్పుడు కవిత రూపంలో మరో ప్రత్యామ్నాయం పుట్టుకురావడం పార్టీ ఉనికిని ప్రశ్నార్థకం చేసేలా ఉంది. మహిళా ఓటు బ్యాంకును లక్ష్యంగా చేసుకుని కవిత వేసిన ఈ ఎత్తుగడ రాబోయే రోజుల్లో రాష్ట్ర రాజకీయాలను ఏ మలుపు తిప్పుతుందోనని రాజకీయ పండితులు ఆసక్తిగా గమనిస్తున్నారు. ఇది కేసీఆర్ రాజకీయ చతురతకు ఓ అగ్నిపరీక్ష వంటిదేనని చెప్పవచ్చు. ముఖ్యంగా పార్టీ పేరు 'తెలంగాణ రాష్ట్ర సేన' అని ఉండటం, కేడర్ అంతా మహిళా పక్షాన నిలబడటం రాబోయే ఎన్నికల్లో ఎలాంటి ప్రభావం చూపుతుందో అన్న చర్చ మొదలైంది. ఒకవైపు బిఆర్ఎస్ రాజకీయాల్లో కొనసాగుతూనే, మరోవైపు కొత్త పార్టీని ప్రకటించడం వెనుక ఉన్న అసలు వ్యూహం ఏమిటన్నది ఇప్పుడు రాజకీయ విశ్లేషకులు ఆసక్తిగా గమనిస్తున్నారు.
Click it and Unblock the Notifications
Sign in with Google