అల్లాటప్పా కాదంటూ సాక్షి డైలీ

వైయస్సార్ కాంగ్రెసు పార్టీ అధ్యక్షుడు వైయస్ జగన్మోహన్ రెడ్డికి చెందిన జగతి పబ్లికేషన్స్‌లో పెట్టుబడులు పెట్టిన కోల్‌కతా కంపెనీలు అల్లాటప్పావి కావంటూ సాక్షి దినపత్రిక వివరణ ఇచ్చింది. సాక్షి దినపత్రికను జగతి పబ్లికేషన్స్ ప్రచురిస్తుంది. జగతి పబ్లికేషన్స్‌లో పెట్టుబడులకు సంబంధించి సిబిఐ ఎఫ్ఐఆర్‌లో పేర్కున్న 74 కంపెనీల్లో కోల్‌కత్తాకు చెందిన 16 కంపెనీలు అల్లాటప్పా కంపెనీలు కాదనే విషయం వాటి పెట్టుబడుల చరిత్రను పరిశీలిస్తే తెలుస్తుందని తెలిపింది. ఆ కంపెనీల జాబితాను సాక్షి దినపత్రిక తన వార్తాకథనంలో ఇచ్చింది. ఆ కంపెనీలన్నీ జగన్ వ్యాపర రంగంలోకి ప్రవేశించక ముందు నుంచే మార్కెట్లో ప్రభావశీలకంగా ఉన్నట్లు తెలిపింది. అవి జగతి పబ్లికేషన్స్‌లో నిబంధనలకు లోబడే పెట్టుబడులు పెట్టాయని స్పష్టం చేసింది.

సాక్షి దినపత్రిక వార్తాకథనం ప్రకారం - కోల్‌కత్తాకు చెందిన 16 కంపెనీలు తాము ఎంచుకున్న సంస్థల్లో ఒక వ్యూహం ప్రకారం పెట్టుబడులు పెడుతుంటాయి. ఒక కంపెనీలో పెట్టుబడులు పెట్టాలని అనుకున్నాయంటే అందులో ఆ 16 కంపెనీలు ఇన్వెస్ట్ చేయాల్సిందే. గత పదేళ్లుగా వాటి యాజమాన్యాలు అనుసరిస్తున్న విధానమిది. అదే పద్ధతిలో జగతిలో ఇవి ఒక గ్రూప్‌గా పెట్టుబడులు పెట్టాయి. ఈ గ్రూప్ సంస్థలన్నీ ఒకే యాజమాన్యానికి చెందినవి కాబట్టి వాటి చిరునామా కూడా ఒకే విధంగా ఉంటుంది.

కోల్‌కత్తా కంపెనీలు ఇప్పటికీ క్రియాశీలకంగా ఉన్నాయని, స్టాక్ ఎక్స్‌ఛేంజీల్లో లిస్టయినవేనని, జగతి పబ్లికేషన్స్‌లో పెట్టుబడులు పెట్టేందుకు పుట్టుకొచ్చివని కావని, ఇంటర్నెట్‌లో 2000 నుంచి ఈ కంపెనీల సమాచారం అందుబాటులో ఉందని చెబుతూ అయినా పట్టించుకోకుండా వాస్తవాలను విస్మరించి బోగస్ అంటూ ఉద్దేశపూర్వకంగా బురదజల్లే కార్యక్రమాన్నికొన్ని మీడియా సంస్థలు పెట్టుకున్నాయని సాక్షి దినపత్రిక వ్యాఖ్యానించింది.

English summary

According to Sakshi daily report - The Kolkata based companies, which invested in YS Jagan's Jagathi publications are not bogus.