బాబు వర్సెస్ వైయస్ జగన్

రాష్ట్ర రాజకీయాలు విచిత్రమైన మలుపులు తిరుగుతున్నాయి. రాష్ట్ర ప్రభుత్వ వైఫల్యాలపై, ప్రజా సమస్యలపై పోరు చేయాల్సిన తెలుగుదేశం పార్టీ అధ్యక్షుడు నారా చంద్రబాబు నాయుడు కాంగ్రెసు కడప పార్లమెంటు సభ్యుడు వైయస్ జగన్ ను టార్గెట్ చేసి విమర్శలు చేస్తున్నారు. తెలుగుదేశం నాయకులు చాలా మందీ చంద్రబాబు బాటలోనే నడుస్తున్నారు. చంద్రబాబు విమర్శలను, ఆరోపణలను ఖండించడంలో వైయస్ జగన్ వర్గం నాయకులు తలమునకలవుతున్నారు. వైయస్ జగన్ కూడా చంద్రబాబుపై పరోక్ష విమర్శలు చేస్తూనే ఉన్నారు. ప్రతిపక్షాలకు ముఖ్యమంత్రి ఎవరో కూడా తెలియడం లేదని, తననే ముఖ్యమంత్రి అనుకుని విమర్శలు చేస్తున్నాయని ఆయన ప్రకాశం జిల్లా ఓదార్పు యాత్రలో ఇటీవల అన్నారు. ప్రస్తుతం రాష్ట్రంలో యుద్ధం వైయస్ జగన్ కు, చంద్రబాబుకు మధ్య జరుగుతోంది.

దివంగత నేత వైయస్ రాజశేఖర రెడ్డి హయాంలో వివిధ రూపాల్లో వైయస్ జగన్ అక్రమంగా ఆస్తులు సంపాదించారని తెలుగుదేశం నాయకులు ఆరోపిస్తున్నారు. వారికి రామోజీ రావు నేతృత్వంలోని ఈనాడు దినపత్రిక అండగా నిలుస్తోంది. వైయస్ జగన్ వివిధ అనుమతుల విషయంలో వైయస్ పాలనలో అధికారాన్ని వాడుకున్నారో, ఎలా ఆస్తులు వెనకేసుకున్నారో తెలుపుతూ ఈనాడు దినపత్రిక వరుస వార్తాకథనాలను ప్రచురిస్తోంది. అటు చంద్రబాబును, ఇటు రామోజీని తప్పు పడుతూ, వారిపై దుమ్మెత్తి పోస్తూ జగన్ కు చెందిన సాక్షి దినపత్రిక కౌంటర్ కథనాలను ప్రచురిస్తోంది.

ప్రస్తుతం సాగుతున్న చంద్రబాబు, జగన్ పోరులో సంపాదనల గొడవనే ప్రధానంగా ఉంది. ప్రజాసమస్యలకు ఎక్కడా చోటు లభించడం లేదు. ఇదిలా ఉంటే, వచ్చే ఎన్నికల నాటికి వైయస్ జగన్ తమకు ప్రధాన ప్రత్యర్థి అవుతుందని భావించడం వల్లనే చంద్రబాబు తన డైరెక్షన్ మార్చినట్లు భావిస్తున్నారు. ఈ మారిన డైరెక్షన్ మేరకు వైయస్ జగన్ ను టార్గెట్ చేసినట్లు భావిస్తున్నారు. అయితే వీరిద్దరికి కూడా తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు కొరకరాని కొయ్యగా మారారు. తెలంగాణలో ఓదార్పు యాత్ర చేపట్టడం వైయస్ జగన్ కు అంత సులభమయ్యే అవకాశాలు లేవు. అదే సమయంలో తెలంగాణలో పర్యటించడం చంద్రబాబుకు కూడా ఇబ్బందికరంగానే ఉంది. వీరిద్దరి ఉమ్మడి శత్రువు కూడా కెసిఆర్ అవుతున్నారు.