గాలి సోదరులకు ఊరట

కర్ణాటక మంత్రులు గాలి బ్రదర్స్ కు పెద్ద ఊరట లభించింది. ముఖ్యమంత్రి యెడ్యూరప్ప ప్రభుత్వం విశ్వాస పరీక్షలో నెగ్గడంతో గాలి జనార్దన్ రెడ్డి సోదరులు గట్టిగా ఊపిరి పీల్చుకునే ఉంటారు. గతంలో యెడ్యూరప్ప ప్రభుత్వాన్ని కూల్చడానికి ప్రయత్నించిన గాలి సోదరులు ఈసారి ప్రభుత్వాన్ని నిలబెట్టడానికి పనిచేశారు. అసమ్మతి శాసనసభ్యులతో మంతనాలు జరిపి కొందరిని తిరిగి యెడ్యూరప్పకు అనుకూలంగా మార్చగలిగారు. యెడ్యూరప్ప ప్రభుత్వం నిలబడడం వల్ల గాలి జనార్దన్ రెడ్డి పెద్ద గండమే తప్పినట్లు భావించవచ్చు. యెడ్యూరప్ప ప్రభుత్వం కూలిపోతే రాష్ట్రంలో గాలి జనార్దన్ రెడ్డికి రాజకీయ మిత్రులే మిగిలే వాళ్లు కారు. రాజకీయ ప్రత్యర్థులకు గాలి జనార్దన్ రెడ్డి మింగుడు పడడం లేదు. ముఖ్యంగా కాంగ్రెసు గాలి సోదరులపై కక్ష కట్టిందనే చెప్పాలి. వారిని మంత్రివర్గం నుంచి తప్పించడానికి రాష్ట్ర గవర్నర్ హెచ్ఆర్ భరద్వాజ్ స్వయంగా రంగంలోకి దిగిన రోజులు కూడా ఉన్నాయి. గత ఎన్నికల్లో బిజెపి విజయం సాధించడంలో గాలి సోదరులు తమ ఆర్థిక బలాన్ని ఉపయోగించారనేది కాంగ్రెసు ఆగ్రహానికి ప్రధాన కారణం.

గాలి సోదరులను పక్కకు తప్పించగలిగితేనే రాష్ట్రంలో రాజకీయాలను ప్రక్షాళన చేయడానికి వీలవుతుందనేవారు కూడా ఉన్నారు. యెడ్యూరప్ప ప్రభుత్వాన్ని కూల్చగలిగితే గాలి సోదరులకు కళ్లెం వేయడానికి కుదురుతుందని కాంగ్రెసుతో పాటు జెడిఎస్ నాయకులు కూడా భావిస్తున్నారు. పార్టీలోని ఒక వర్గానికి కొమ్ము కాస్తున్నారనే ఉద్దేశంతో బిజెపిలో ఓ వర్గం కూడా వారిపై కోపంగా ఉంది. యెడ్యూరప్ప ప్రభుత్వం బలపరీక్ష నెగ్గే వరకు గాలి సోదరులు తీవ్ర ఉత్కంఠతో ఎదురు చూశారని చెప్పడంలో అతిశయోక్తి లేదు. కేంద్రంలో తమకు తీవ్ర వ్యతిరేకంగా ఉన్న కాంగ్రెసు ప్రభుత్వం ఉండడం వల్ల యెడ్యూరప్ప ప్రభుత్వం పడిపోతే గాలి సోదరులకు కనాకష్టంగానే ఉండేది. అక్రమ మైనింగ్ ఆరోపణలు వారిపై బోలెడు ఉన్నాయి. వాటిని ఆసరా తీసుకుని గాలి సోదరులకు అవకాశం చిక్కితే ముప్పు తిప్పలు పెట్టేందుకు కాంగ్రెసు సిద్ధంగా ఉంది.

గాలి సోదరులు తిరుగుబాటు చేసినప్పుడు పరిస్థితి వేరు. ఇప్పుడు పరిస్థితి వేరు. అప్పుడు యెడ్యూరప్ప స్థానంలో తమకు పూర్తిగా అనుకూలంగా ఉండే నాయకుడు ముఖ్యమంత్రిగా ఉండాలని వారు భావించారు. వారు ప్రభుత్వాన్ని కూల్చాలని అనుకోలేదు. ప్రస్తుత తిరుగుబాటు ప్రభుత్వాన్ని కూల్చేయాలనేది. ప్రస్తుత తిరుగుబాటు వల్ల ప్రభుత్వం కూలిపోయి రాష్ట్రంలో రాష్ట్రపతి పాలన వస్తే గాలి సోదరులు తీవ్రమైన ఇబ్బందులను ఎదుర్కోవాల్సి ఉండేది. వారు ప్రభుత్వ పతనాన్ని కోరుకోలేదు. అందువల్లనే ప్రభుత్వాన్ని నిలబెట్టడానికి గాలి జనార్దన్ రెడ్డి ప్రయత్నించారు.