కాంగ్రెస్ కు మహేష్ మొండి 'చెయ్యి'!

ఇటువైపు చిరంజీవి, పవన్ కళ్యాణ్ "ప్రజారాజ్యం" తరఫున, అటువైపు నందమూరి హీరోలు "తెలుగుదేశం" పార్టీ తరఫున మోహరించిన నేపధ్యంలో తమ పార్టీలో మహేష్ బాబు లాంటి హీరో ఒక్కరున్నా చాలని కాంగ్రెస్ భావించింది. మహేష్ తండ్రి కృష్ణ కుటుంబం పూర్వీకులంతా కాంగ్రెస్ వారే కావడంతో ఆ కుటుంబానికి వైఎస్ అధికారంలోకి వచ్చిన తర్వాత అనేక పదవులు దక్కాయి. కృష్ణకు చెందిన పద్మాలయ భూములకు సంబంధించి వైఎస్ ప్రభుత్వం దాదాపు వంద కోట్ల రూపాయల మేరకు ఫేవర్ చేసిందని పత్రికలు కోడై కూశాయి.

ఆ తర్వాత కృష్ణ, విజయనిర్మల వైఎస్ క్యాంపు కార్యాలయానికి వెళ్ళి ఒక పెళ్ళికి వారిని స్వయంగా ఆహ్వానించి వచ్చారు. అయితే కాంగ్రెస్ ప్రభుత్వం తమకెన్ని ఫేవర్లు చేసినా మహేష్ బాబు కాంగ్రెస్ తరఫున ప్రచారం చేసే విషయంలో కృష్ణ ఎటువంటి కమిట్ మెంట్ ఇవ్వకపోవడం విశేషం. కాంగ్రెస్ నుంచి ప్రచారం వత్తిడికి దూరంగా ఉండేందుకు మహేష్ బాబు తన తాజా చిత్రం షూటింగ్ కోసం రెండు మూడు నెలల పాటు ఇతర రాష్ట్రాలకు వెళ్తున్నట్టు సమాచారం. మహేష్ త్రివిక్రం శ్రీనివాస్ దర్శకత్వంలో నటించనున్న విషయం తెలిసిందే.