చిరు ప్రత్యర్ధులు రోజా, రాజశేఖర్ లా?

తెలుగుదేశం పార్టీలో తారాజువ్వలా దూసుకెళ్తున్న రోజాలో అతి విశ్వాసం కనిపిస్తోంది. అనతి కాలంలోనూ రాజకీయాల లోతుపాతులు తెలుసుకుని, పదునుగా మాట్లాడడం వరకు రోజాకు మంచి మార్కులే వస్తాయి. వ్యాఖ్యానాలు చేయడంలో, ప్రత్యర్ధులకు చురకలు పెట్టడంలో ఆమె నన్నపనేని రాజకుమారిని మించిపోయింది. ప్రత్యక్ష ఎన్నికల్లో పోటీ చేయాలన్న తహ తహ ఆమెలో కన్పిస్తోంది. ఈసారి చంద్రగిరి అసెంబ్లీ టికెట్ ను ఆమె ఆశిస్తోంది. ఆమె ఆ విషయాన్ని పార్టీ అధినేత చంద్రబాబు నాయుడికి ఇప్పటికే చెప్పారు. కానీ ఆ టికెట్ ను నారా రామూర్తి నాయుడికి ఇప్పించాలని బాలకృష్ణ పట్టుదలగా ఉన్నారు.

"నాకు చంద్రగిరి టికెట్ ఇచ్చే అవకాశం లేదంటే దాని అర్ధం నన్ను చిరంజీవి మీద పోటీ పెడతారని అనుకోవాలి" అని రోజా ఈ మధ్య వ్యాఖ్యానించింది. చిరంజీవి మూడు స్ధానాలకు (కోస్తా, రాయలసీమ, తెలంగాణ ప్రాంతాల్లోని) పోటీ చేసే అవకాశాలు కనిపిస్తున్నాయి. తిరుపతి నుంచి చిరంజీవి పోటీ చేస్తే ఆయనపై తెలుగుదేశం అభ్యర్ధి రోజా కావచ్చు. మరో వైపు కాంగ్రెస్ ఆదేశిస్తే చిరంజీవి మీద పోటీ చేయడానికి సిద్ధమని హీరో రాజశేఖర్ అంటున్నాడు. కానీ కాంగ్రెస్ లో హేమాహేమీలు ఉన్నారు కాబట్టి ఆయనకు ఆ టికెట్ లభించే అవకాశాలు తక్కువ. ఈ ముగ్గురు స్టార్లు ఒకవేళ ఒకేస్ధానం నుంచి ఢీకొంటే? ఫలితాన్ని తేలిగ్గా ఊహించుకోవచ్చు.