రాజుగారి అప్పుల బాధ!

తెలుగు సినిమా రంగంలో భారీ నిర్మాతగా పేరుగాంచిన ఎం ఎస్ రాజు సత్యం కంప్యూటర్స్ షేర్లలో పెట్టుబడి పెట్టి భారీ నష్టపోయినట్టు సమాచారం. వరుసగా మూడు సంక్రాంతి సినిమాలను సూపర్ హిట్స్ చేసిన రాజుకు ఈమధ్య సినిమారంగం కూడా అచ్చి రావడం లేదు. ఆయన తాజా చిత్రం "మస్కా"పై 18 కోట్లు ఖర్చు కాగా అందులో సగం డబ్బు కూడా వెనక్కి వచ్చే అవకాశాలు లేవు. ఆయన "వాన", పౌర్ణమి" చిత్రాలు బాక్సాఫీసు వద్ద బోల్తా పడ్డాయి.

"మనసంతా నువ్వే", "వర్షం", "నువ్వు వస్తానంటే నేనొద్దంటానా" వంటి సూపర్ డూపర్ హిట్స్ ఇచ్చిన ఎం ఎస్ రాజు ఆ డబ్బులను సత్యం కంప్యూటర్స్ షేర్లలో, కొంపల్లి (రామలింగరాజు ఫామ్ హౌస్ సమీపంలో) లో 20 ఎకరాల పొలానికి వెచ్చించినట్టు తెలుస్తోంది. సత్యం షేర్లపై పెట్టిన కోట్లాది రూపాయలు ఇప్పుడు చిత్తు కాగితాల్లా మారిపోయాయి.

ఆ ఇరవై ఎకరాల విలువ ఒకప్పుడు 40 కోట్లు కాగా ఇప్పుడు రియల్ ఎస్టేట్ ధరల పతనం కారణంగా వాటి విలువ సగానికి సగం పడిపోయినట్టు తెలుస్తోంది. ఇటీవల "మస్కా" చిత్రం కోసం ఆ పొలాన్ని ఒక ఫైనాన్సర్ కు తొమ్మిది కోట్లకు తాకట్టు పెట్టినట్టు తెలిసింది. రాజుగారు అప్పుల బాధ నుంచి కోలుకుని మనకు మరిన్ని మంచి చిత్రాలు అందిస్తారని ఆశిద్దాం.