చిరుపై బాబు మళ్లీ రుసరుస!

గతంలో ప్రజారాజ్యం వ్యవస్థాపక అధ్యక్షుడు చిరంజీవిని లక్ష్యంగా చేసుకొని విమర్శలు గుప్పించిన తెలుగుదేశం పార్టీ అధ్యక్షుడు నారా చంద్రబాబునాయుడు గత కొంతకాలంగా ఆ ఒరవడి తగ్గించాడు. అయితే బాబు ఇప్పుడు మళ్లీ చిరంజీవిని లక్ష్యంగా చేసుకుని మాట్లాడుతున్నాడు. మంత్రివర్గంలో చేరడానికి చిరంజీవి మొగ్గుచూపుతన్న దృష్ట్యా చంద్రబాబుకు మంచి అవకాశం దొరికింది. రోశయ్య ముఖ్యమంత్రిగా ఉంటే తప్పకుండా మంత్రివర్గంలో ప్రజారాజ్యం చేరేదే. అందుకే పోలవరం పేరుతో రోశయ్య ఢిల్లీ వెళ్లినప్పుడు ఢిల్లీలోని కాంగ్రెస్ పెద్దలతో మంతనాలు జరిపారు. అయితే అనూహ్యంగా రోశయ్య రాజీనామా చేయటంతో చిరంజీవి పూర్తిగా నిరాశకు లోనయ్యారు. అవసరమైతే స్నేహహస్తం అందిస్తామని మొదట చెప్పిన చిరు రోశయ్య రాజీనామా చేయగానే నిర్మాణాత్మక ప్రతిపక్షంగానే వ్యవహరిస్తామని ప్రజారాజ్యం నమ్మబలికింది.

కిరణ్ కుమార్ రెడ్డి ముఖ్యమంత్రి కాగానే తమ అవసరం రాదని ప్రజారాజ్యం భావించి ప్రతిపక్షంగానే ఉంటామని చెప్పింది. అయితే కడప పార్లమెంటు సభ్యుడు వైఎస్ జగన్మోహన్ రెడ్డినుండి కిరణ్ ప్రభుత్వానికి ముప్పు ఉందని తెలిసి మళ్లీ చిరంజీవి పాత పాడుతున్నారు. దీంతో చంద్రబాబునాయుడు మళ్లీ చిరంజీవిని లక్ష్యంగా చేసుకుంటున్నాడు. చిరంజీవి ప్రజారాజ్యం పార్టీని కాంగ్రెస్ లో కలుపేస్తాడని, చిరంజీవి పార్టీ స్థాపించినప్పటికీ ఆయన కాంగ్రెస్ వ్యక్తేనని చంద్రబాబు గతంలో విమర్శించారు.

తాజా చిరంజీవి పొంతన కుదరని ప్రకటనలతో చంద్రబాబుకు అవకాశం దొరికింది. గతంలో తాను చిరంజీవి కాంగ్రెస్ వ్యక్తి అని తాను చెప్పిన మాటలు నిజమని ప్రజల ముందుకు తీసుక వెళ్లవచ్చు. ప్రజా సమస్యల పరిష్కారం కోసం పోరాడుతానన్న చిరంజీవి మంత్రివర్గంలో చేరి, ఆ తర్వాత కాంగ్రెస్ పార్టీలో ప్రజారాజ్యాన్ని విలీనం చేస్తాడని ఇప్పటికే తెలుగుదేశం నాయకులు అంటున్నారు.