చిరంజీవి మార్కు న్యూస్

రాజకీయ పార్టీల నేతలు ఎవరికి వారు మీడియా సంస్థలను ఏర్పాటు చేసుకోగా తామెందుకు వెనకబడిపోవాలనే ఉద్దేశంతో ప్రజారాజ్యం అధ్యక్షుడు చిరంజీవి ఉన్నట్లున్నారు. వైయస్ జగన్ సాక్షి దినపత్రిక, సాక్షి టీవీ చానెళ్లతో అదరగొడుతుండగా, తెలుగుదేశం పార్టీ అధినేత చంద్రబాబు ఈనాడు, ఆంధ్రజ్యోతిలతో సరిపెట్టుకోకుండా తన సమీప బంధువు టీవీ చానెల్ కు పూర్తి హంగులు కల్పించేందుకు సిద్ధపడుతున్నారు. తెలంగాణ రాష్ట్ర సమితి (తెరాస) అధ్యక్షుడు రాజ్ న్యూస్ ను దడదడలాడిస్తూ దినపత్రిక తేవడానికి సిద్ధఫడుతున్నారు. తాజాగా చిరంజీవి వారి బాటలో నడిచేందుకు సిద్ధపడ్డారు. పక్షానికోసారి అంటే పదిహేను రోజులకో సారి ఓ న్యూస్ బులిటెన్ ను తెచ్చేందుకు రంగం సిద్ధ చేసుకుంటున్నారు.

నిజానికి, దినపత్రిక తేవాలని చిరంజీవికి సూచనలు చేశారట. అయితే, సి. రామచంద్రయ్య, కోటగిరి విద్యాధర రావు వంటి సీనియర్ నాయకులు అది సరిపడదని చెప్పారట. న్యూస్ బులిటెన్ తెస్తే బాగుంటుందని, అది కూడా పక్షానికి ఒక్కటి తెస్తే చాలునని చెప్పారట. దాంతో చిరంజీవి దీనికి సెటిలైపోయారని చెబుతున్నారు. అందులో ఏ విధమైన వార్తలు, వార్తాకథనాలు ఉంటాయని వేరుగా చెప్పాల్సిన అవసరం లేదు. పార్టీ రాజకీయ, సామాజిక కార్యక్రమాలను అందులో ఇస్తారు. పార్టీపై వస్తున్న రాజకీయ, ఇతర విమర్సలను అందులో చీల్చిచెండాడాలని నిర్ణయించుకున్నారని తెలుస్తోంది. చిరంజీవి మీద ఈగ వాలినా కలం పోటుతో గట్టిగా సమాధానం చెప్తారని మనం భావించాల్సి ఉంటుంది.