నారా లోకేష్ ఎంట్రీని కొట్టేయని చంద్రబాబు

తన కుమారుడు నారా లోకేష్ రాజకీయ ప్రవేశాన్ని తెలుగుదేశం పార్టీ అధ్యక్షుడు నారా చంద్రబాబు నాయుడు కొట్టేయడం లేదు. ఆ విషయంపై ఆయన సూటిగా కూడా మాట్లాడడం లేదు. నారా లోకేష్‌కు చంద్రబాబు పార్టీ పగ్గాలు అప్పగించడానికి ప్రయత్నిస్తున్నారనే అనుమానంతోనే రాజ్యసభ సభ్యుడు నందమూరి హరికృష్ణ అసమ్మతిబావుటా ఎగురేస్తున్నారు. అయినా సరే, నారా లోకేష్ రాజకీయాల్లోకి రాడనే విషయాన్ని చంద్రబాబు చెప్పడం లేదు. పార్టీ ఆవిర్భావ దినోత్సవం సందర్భంగా ఆయన శుక్రవారం సాయంత్రం వివిధ టీవీ చానెళ్లకు ప్రత్యేక ఇంటర్వ్యూలు ఇచ్చారు.

నారా లోకేష్ గురించి అడిగినప్పుడు - హరికృష్ణ రాజ్యసభ సభ్యుడిగా ఉన్నారని, బాలకృష్ణ వచ్చే ఎన్నికల్లో పోటీ చేస్తానని అంటున్నారని, పార్టీని మెరుగుపరచడానికి ఎవరైనా సరే సలహాలు ఇస్తే, తమ ఉద్దేశాలను చెప్తే పార్టీ అధ్యక్షుడిగా తాను చేయాల్సిందేమిటో చేస్తానని ఆయన అన్నారు. కుటుంబ సభ్యులైనా సరే, ఎవరైనా సరే బహిరంగ వ్యాఖ్యలు చేయకుండా విషయాలు తనకు చెప్తే వాటిని పరిష్కరించి, తగిన నిర్ణయాలు తీసుకోవాల్సిన బాధ్యత తనపై ఉందని ఆయన అన్నారు. పార్టీని కాపాడి, దాన్ని భావితరాలకు అందించాల్సిన బాధ్యత తనపై ఉందని ఆయన అన్నారు.