అమెరికాకు ఆంధ్రా భయం: వెబ్‌సైట్లో తెలంగాణ

By Srinivas

Published: Sunday, January 27, 2013, 10:36 [IST]

ఆంధ్రప్రదేశ్ అంటే అమెరికా హడలిపోతోంది! రాష్ట్రంలో ఊపందుకున్న సమైక్యాంద్ర, తెలంగాణ ఉద్యమాల నేపథ్యంలో తమ దేశస్తులను అప్రమత్తంగా ఉండాలని అమెరికా హెచ్చరించింది. ఆంధ్రప్రదేశ్‌లో ఉండే తమ దేశ పౌరులకు ముందస్తు జాగ్రత్తలు, హెచ్చరికలు అమెరికా కాన్సులేట్ చేసింది. తెలంగాణ, సమైక్యాంధ్ర ఉద్యమాలు, కేంద్ర హోంమంత్రి సుశీల్ కుమార్ షిండే ప్రకటనల నేపథ్యంలో రాష్ట్రం అట్టుడుకుతున్న విషయం తెలిసిందే.

అదే సమయంలో మజ్లిస్ పార్టీ నేతలు అక్బరుద్దీన్, అసదుద్దీన్‌ల అరెస్టులు. ఆంధ్రప్రదేశ్ ఉద్రిక్తంగా మారింది. ఈ పరిణామాలు ఏ పర్యవసానాలకు దారితీస్తాయో అనే ఆందోళనలో అమెరికా ఉన్నట్లుగా కనిపిస్తోంది. దీంతో ఆంధ్రప్రదేశ్‌లో ఉన్న తమ పౌరులకు కొన్ని జాగ్రత్తలు సూచిస్తూ అమెరికన్ కాన్సులేట్ ఓ ప్రకటన జారీ చేసింది. హైదరాబాద్ ఇతర పట్టణాల్లో ఫిబ్రవరి 4వ తేదీ వరకూ చాలా అప్రమత్తంగా ఉండాలని ఆ ప్రకటనలో హెచ్చరించింది.

ఓ నెలరోజుల వరకూ ఉద్యమం, ఉద్రిక్త పరిస్థితులు కొనసాగవచ్చునని, ఈ నేపథ్యంలో ఘర్షణలు జరిగే అవకాశాలున్నాయని తెలిపింది. వీటికి తోడు మతపరమైన పండగలు, జాతీయ దినోత్సవాలు జరగనున్నందున జనం భారీ సంఖ్యలో రోడ్లు ఎక్కవచ్చునని, ఈ పరిస్థితుల్లో ట్రాఫిక్ జామ్ అయి జనజీవనానికి ఆటంకం ఏర్పడవచ్చని పేర్కొంది.

మీడియా వ్యక్తులు, భద్రతా సిబ్బంది ఉన్న ప్రాంతాల మీదుగా రాకపోకలు సాగించాలని, అప్రమత్తంగా ఉండాలని హెచ్చరించింది. తాజాగా అమెరికా కాన్సులేట్ తన వెబ్‌సైట్‌లో తెలంగాణ సమస్యను పతాక శీర్షికన ఉంచింది. ఈ సమస్యకు ఏదో ఒక పరిష్కారం దొరికే వరకూ ఆంధ్రప్రదేశ్‌లోని తెలంగాణ ప్రాంతంలో పరిస్థితులు ఉద్రిక్తంగా ఉండే అవకాశాలున్నాయని తెలిపింది.

Published On January 27, 2013