అన్నీ పరిశీలించాకే నిర్ణయం: బాబు

హైదరాబాద్‌: అన్ని కోణాల నుంచి పరిశీలన జరిపిన తర్వాతనే నక్సలైట్లతో చర్చలు జరిపేవిషయంపై నిర్ణయం తీసుకుంటామని ముఖ్యమంత్రి నారా చంద్రబాబునాయుడు చెప్పారు.పీపుల్స్‌వార్‌కు, ప్రభుత్వానికి మధ్య చర్చల కోసం పౌర స్పందన వేదిక కొన్ని ప్రతిపాదనలు చేసింది. ఈ ప్రతిపాదనలకు స్పందిస్తూ తాము చర్చలకు సిద్ధమేనంటూపీపుల్స్‌వార్‌ ప్రకటించింది. దీనిపై ముఖ్యమంత్రి చంద్రబాబునాయుడు సోమవారంవిలేకరులతో మాట్లాడారు.

నక్సలైట్లతో చర్చలు జరిపేవిషయంపై నిర్ణయం తీసుకోవడానికి ముందు అఖిల పక్ష సమావేశంలో చర్చిస్తామని, అన్ని వర్గాలను సంప్రదిస్తామని ఆయన చెప్పారు. చర్చలకుపీపుల్స్‌వార్‌ నక్సలైట్లు అనుసరిస్తున్న వైఖరి ఏమిటో స్పష్టంగా లేదని ఆయన అన్నారు. ప్రభుత్వం మాత్రం నక్సలైట్లు జన జీవన స్రవంతిలో కలిసిపోవాలనివిజ్ఞప్తి చేస్తూ అరమరికలు లేకుండా వ్యవహరిస్తోందని ఆయన అన్నారు. హింసను ఎవరు ప్రేరేపించినా సహించబోమని ఆయన స్పష్టం చేశారు.