సర్కారు వైఫల్యంః కోర్టే శరణ్యం

లక్నోః అయోధ్య సమస్య పరిష్కారంలో తాను విఫలమైనట్టుగా ప్రధాని వాజ్‌పేయి అంగీకరించారు. చర్చల ద్వారా అయోధ్య సమస్యను పరిష్కరించాలని తాను చేసిన ప్రయత్నాలు ఫలించలేదని ఆయన చెప్పారు. ఇక కోర్టు తీర్పు కోసం ఎదురుచూడ్డం మినహా చేసేదేమీ లేదని ఆయన నిర్వేదం వ్యక్తం చేస్తారు.

చర్చల వైఫల్యానికి రెండు పక్షాలు సమాన బాధ్యత వహించాలని ఆయన అన్నారు. రెండు పక్షాలు మొండివైఖరిని అవలంభిస్తున్న కారణంగా సమస్య అపరిష్కృతంగా వుండిపోయిందని ఆయన అన్నారు. సమస్య పరిష్కారానికిమీ తరఫున ఏదైనా పరిష్కారం చూపారా అని ప్రశ్నించగా, చర్చలు ఒక దశలోనే ఆగిపోయాయని పరిష్కారం సూచించేవరకు చర్చలు వెళ్లలేదని ఆయనవివరించారు. ఇంతకూ చర్చలు జరిపిన రెండు పక్షాలు ఏవో మాత్రం ఆయన వెల్లడించలేదు. గతంలో లక్నోలోనే ఒక సభలో మాట్లాడుతూ ఆయోధ్య సమస్య పరిష్కారానికి మంతనాలు జరుగుతున్నట్టగా ప్రధాని ప్రకటించారు. మార్చి 12లోగా ఒక పరిష్కారం సాధించే అవకాశం వున్నదని కూడా ఆయనఅప్పట్లోనే ప్రకటించారు.ఇప్పుడిక ఈ చర్చలపై తనకెటువంటి ఆశలు లేవని ఆయన స్పష్టం చేశారు. అయితే 1992 నాటి పరిస్థితి పునరావృత్తం కాకుండా మాత్రం గట్టి చర్యలు తీసుకుంటామని ఆయన చెప్పారు. ఆలయ నిర్మాణానికివిశ్వహిందూ పరిషత్‌ మార్చి 12ను గడువుగా ప్రకటించినవిషయం ప్రస్తావించగా, గడువు రానీయండి, పరిస్థితిని ఎలా ఎదుర్కోవాలో ప్రభుత్వానికి బాగా తెలుసు అని ఆయన అన్నారు. వాజ్‌పేయి ప్రభుత్వం కూలినా తాము లెక్కచేయమని విహెచ్‌పి ప్రకటించడాన్ని ప్రస్తావిస్తూ, సాధువులు, సన్యాసులు కూడా ప్రభుత్వాల గురించి మాట్లాడం కన్నా ఇంకా ఏం కావాలని ఆయన వ్యంగ్యంగా అన్నారు.