పాక్‌ ప్రతీకారంః భారత్‌ ఆగ్రహం

న్యూఢిల్లీః పాకిస్తాన్‌లోని భారత దౌత్య కార్యాలయ ఉద్యోగులిద్దరిని తమ దేశం నుంచి బహిష్కరిస్తూ పాకిస్తాన్‌ జారీచేసిన ఉత్తర్వులను భారత్‌ తీవ్రంగా ఖండించింది. సదరు ఉద్యోగులపై పాకిస్తాన్‌ అధికారులు చేసిన ఆరోపణలను భారత విదేశాంగ శాఖ తీవ్రంగా ఖండించింది.

పాక్‌ బహిష్కరించిన ఉద్యోగులు ప్రమోద్‌ కుమార్‌సక్సేనా, మఖాన్‌ సింగ్‌ను స్వదేశం రప్పించడానికి ఏర్పాట్లు చేస్తున్నట్టుగా విదేశాంగ ప్రతినిధి నిరుపమా రావు చెప్పారు. గూఢచర్యానికి ప్రయత్నిస్తూ పట్టుబడిన ఢిల్లీలోని పాక్‌ రాయబార కార్యాలయానికి చెందిన ఇద్దరు ఉద్యోగులను భారత్‌ దేశం నుంచి బహిష్కరించినందుకు పాక్‌ ప్రతీకారంగా భారతీయ ఉద్యోగులపై కూడా చర్యతీసుకుని వుంటుందని భావిస్తున్నారు. ఇదే విషయాన్నివిలేకరులు ప్రస్తావించగా, నిరుపమారావు దాదాపుగా ఏకీభవించారు. ఇస్లామాబాద్‌లో చర్చిపై జరిగిన దాడి వెనక భారతీయ సంస్థల ప్రమేయం వున్నదంటూ పాకిస్తాన్‌ చేసిన ఆరోపణలను కూడా ఆమె తీవ్రంగా ఖండించారు. తన తప్పులను కప్పిపుచ్చుకునేందుకు బాధ్యత నుంచి తప్పుకునేందుకు పాకిస్తాన్‌ నిందలను భారత్‌మీద వేయడం పరిపాటేనని ఆమె వ్యాఖ్యానించారు.