దోపిడీ దొంగల ముఠాస్వైర విహారం

సంగారెడ్డి: హత్యకాండలకు పాల్పడుతూ దోపిడీలు చేస్తున్న దొంగల ముఠా మరోసారి మెదక్‌ జిల్లా సదాశివపేట పట్టణ పరిధిలో ఆదివారం అర్థరాత్రి మరో మహిళను బలిగొంది. రెండు నెలల్లో మూడు ఘటనలకు పాల్పడి ముగ్గురి ప్రాణాలు తీసుకున్న ఈ ముఠా పోలీసులకు సవాల్‌గా మారింది.

తాజా సంఘటనవివరాల్లోకి వెళ్లే- రాత్రి రెండు గంటల ప్రాంతంలో పట్టణ శివారులో నివాసం ఉంటున్న న్యాయవాది ముజఫర్‌ అలీ ఇంటిపై ముసుగులు ధరించిన దొంగలు దాడి చేశారు. ఆయన భార్య సబియాబేగం (30)ను హతమార్చి, ఇంట్లోవారిని గాయపరిచారు. బీరువాలోని నగదును, బంగారు ఆభరణాలను దోచుకెళ్లారు. తీవ్రంగా గాయపడిన అలీని నిమ్స్‌ ఆస్పత్రికి తరలించారు. దొంగలు ఇంటి పై కప్పు నుంచి లోనికి ప్రవేశించారు. గత రెండు నెలల్లో సదాశివపేట పోలీసు సర్కిల్‌ పరిధిలో ఇదే తరహాలో మూడు దోపిడీలు జరిగాయి. ఒక్కో సంఘటనలో ఒక్కొక్కరు మృతి చెందారు.