యధావిధిగా కాశ్మీర్‌ ఎన్నికలు

శ్రీనగర్‌ః జమ్ము- కాశ్మీర్‌అసెంబ్లీ ఎన్నికలను వాయిదా వేయవలసిందిగా వచ్చిన అభ్యర్ధనలను ఎన్నికల కమిషన్‌ తిరస్కరించింది. షెడ్యూలు ప్రకారమే ఎన్నికలు జరుగుతాయని, మొదటి దశ ఎన్నికల నోటిఫికేషన్‌ ఆగస్టు 22న జారీ చేస్తామని కమిషన్‌ సోమవారం స్పష్టం చేసింది. చీఫ్‌ ఎలక్షన్‌ కమిషనర్‌ జెఎం లింగ్డో నాయకత్వంలో ముగ్గురు సభ్యులు గల ఎన్నికల సంఘం జమ్ము-కాశ్మీరులో ఎన్నికల నిర్వహణపైసైన్యం, పోలీసు, సివిల్‌
అధికారులతో సమీక్షించింది.

కాశ్మీర్‌ కమిటీ చైర్మన్‌ రామ్‌ జెఠ్మలానీ ఎన్నికల వాయిదాకు అభ్యర్ధించిన ఒక్క రోజులోనే కమిషన్‌అందుకు వ్యతిరేకంగా ప్రతిస్పందించింది. ఎన్నికలనుస్వేఛ్చగా సక్రమంగా నిర్వహించడంపై ఆదివారం నాటి సమావేశంలో చర్చించినట్టు జమ్ము-కాశ్మీర్‌ చీఫ్‌ ఎలక్టోరల్‌ ఆఫీసర్‌ ప్రమోద్‌ జైన్‌విలేకరులకు చెప్పారు. ఎన్నికల నిర్వహణ కోసం ఉత్తరప్రదేశ్‌ పంజాబ్‌ నుంచి 5 వేల మంది అధికారులను ఎంపిక చేసినట్టు ఆయన చెప్పారు. ఎన్నికల నిర్వహణ పక్షపాత రహితంగా జరిగేందుకు ఇతర రాష్ట్రాల నుంచి అధికారులను తెప్పిస్తున్నట్టు ఆయన వెల్లడించారు.