ప్రధాని ఆరోగ్యంపై అనారోగ్య చర్చ

న్యూఢిల్లీ: ప్రధాని వాజ్‌పేయి ఆరోగ్యం మరోసారి చర్చగా మారింది. తరుచుగా అనారోగ్యం పాలవుతున్న వాజ్‌పేయి ప్రధానిగా కొనసాగడంపై గత కొద్ది నెలలుగా జరుగుతోన్న చర్చ ఇప్పుడు మరింత ఊపందుకొంది. ఆదివారం గొంతునొప్పి తీవ్రం కావడంతో వాజ్‌పేయి విశ్రాంతిలో ఉన్నారు. ఎన్నో ముఖ్యమైన సమావేశాలు ప్రధాని అనారోగ్యం వల్ల వాయిదాపడ్డాయి.

ప్రతి మంగళవారం జరిగే క్యాబినెట్‌ సమావేశాన్ని కూడా రద్దు చేశారు. అయితే, ప్రధాని ఆరోగ్యం గురించి ఆందోళన చెందాల్సిన అవసరం లేదని ప్రధాని కార్యాలయం మంగళవారం ఒక ప్రకటన విడుదల చేసింది. అయితే, మేధావులు, ప్రతిపక్షనేతలు మాత్రం నిత్య అనారోగ్య ప్రధాని ప్రభుత్వాన్ని సమర్ధంగా నిర్వహించగలడా అని సందేహం వ్యక్తం చేస్తున్నారు.

న్యూఢిల్లీలో ప్రస్తుతం వాడివేడిగా జరుగుతోన్న చర్చలోఆరెస్సెస్‌, విఎచ్‌ పికి చెందిన నేతలు కూడా ఉండడంవిశేషం. అద్వానీని ప్రధాని పదవి కట్టబెట్టేందుకు ఇలాంటి అనారోగ్య చర్చ జరుగుతోందని ప్రధాని సన్నిహిత వర్గాలు ఆరోపిస్తున్నాయి.

వాజ్‌ పేయి సార్క్‌ సమావేశాలకు హాజరవుతారా లేదా అన్నవిషయం ఇంకా నిర్ధారణ కాలేదు. ఈసారి సార్క్‌ సమావేశాలు పాకిస్థాన్‌ లో జరగనున్నాయి.