సమాల్ నివేదికపై గందరగోళం: బిజెపి వాకౌట్

హైదరాబాద్: మాజీ విజిలెన్స్ కమీషనర్ సమాల్ నివేదికపై ప్రభుత్వ వైఖరికి నిరసనగా తెలుగుదేశం, భారతీయ జనతా పార్టీ (బిజెపి) సభ్యులు బుధవారంనాడు శాసనసభ నుంచి వాకౌట్ చేశారు. సమాల్ నివేదిక శాసనసభలో తీవ్ర గందరగోళం చెలరేగింది. సమాల్ నివేదికను సభకు సమర్పించాలని తెలుగుదేశం పార్టీ సభ్యుడు నాగం జనార్దన్ రెడ్డి డిమాండ్ చేశారు. సమాల్ పలువురు ఐఎఎస్ అధికారులపై, ముఖ్యమంత్రి వైయస్ రాజశేఖర రెడ్డిపై ఆ మధ్యకాలంలో తీవ్ర విమర్శలు చేసిన విషయం తెలిసిందే.

సమాల్ నివేదిక తమకు అందలేదని మంత్రి డి. శ్రీనివాస్ చెప్పారు. ప్రభుత్వానికి అందకపోతే నివేదిక తమ వద్దకు ఎలా వచ్చిందని నాగం జనార్దన్ రెడ్డి అడిగారు. సమాల్ తన నివేదికను ప్రభుత్వానికి ఇవ్వకుండా మీడియాకు ఇచ్చారని, దానిపై ప్రభుత్వ ప్రధాన కార్యదర్శి నేతృత్వంలో విచారణ జరిపిస్తున్నామని, విచారణ అనంతరం తగిన చర్యలు తీసుకుంటామని మంత్రి చెప్పారు. దీంతో సంతృప్తి చెందని తెలుగుదేశం, బిజెపి సభ్యులు సభ నుంచి వాకౌట్ చేశారు.