వైకుంఠం క్యూ కాంప్లెక్స్-2 లో నూతనంగా.. !!

శ్రీ‌వారి ద‌ర్శ‌నార్థం తిరుమ‌ల‌కు వ‌చ్చే భ‌క్తుల సంఖ్య రోజురోజుకు పెరుగుతోంది. సాధారణ రోజుల కంటే భక్తుల సంఖ్య భారీగా పెరిగింది. వారం రోజులుగా అసాధారణంగా భక్తులు శ్రీవారి చెంతకు చేరుకుంటోన్నారు. దేవదేవుడిని దర్శించుకుంటోన్నారు. తమ మొక్కులు చెల్లించుకుంటోన్నారు. వేలాది వస్తోండటంతో తిరుమల కిటకిటలాడుతోంది. దీంతో తిరుమల తిరుపతి దేవస్థానం అధికారులు ప్రత్యేక చర్యలు చేపట్టారు. అదనపు సౌకర్యాలను కల్పిస్తోన్నారు.

భక్తులకు ఎండ తీవ్రత నుంచి ఉపశమనం కల్పించేందుకు బాటగంగమ్మ సర్కిల్ నుండి గోగర్భం డ్యామ్ సర్కిల్ మీదుగా ఔటర్ రింగ్ రోడ్ వరకు చలువ పందిళ్లు వేశారు టీటీడీ అధికారులు. వైకుంఠం క్యూ కాంప్లెక్స్-2, మ్యూజియం ప్రాంగణం, నారాయణగిరి ఉద్యానవనాల్లోనూ ఈ షెల్టర్లు అందుబాటులోకి తీసుకొచ్చారు. శ్రీవారి ఆలయం పరిసరాలు, లడ్డూ కౌంటర్లు, భక్తుల రాకపోకలు అధికంగా ఉండే ప్రాంతాల్లో చలువ పందిళ్ల నిర్మాణం చేపట్టారు.

నాలుగు మాడ వీధుల్లో సింథటిక్ ఎనామెల్ కూల్ పెయింట్ వేయడం ద్వారా భక్తులు నేల వేడి నుండి ఉపశమనం పొందేలా చర్యలు తీసుకున్నారు. బాట గంగమ్మ గుడి సర్కిల్ నుండి ఔటర్ రింగ్ రోడ్డు వరకు ఏర్పాటు చేసిన క్యూలైన్లలో తాత్కాలిక మరుగుదొడ్లు ఏర్పాటు చేశారు. టీటీడీ అన్న ప్ర‌సాద విభాగం ఆధ్వ‌ర్యంలో శ్రీ‌వారి సేవ‌కుల ద్వారా క్యూలైన్ల‌లోని భ‌క్తుల‌కు నిరంత‌రాయంగా తాగునీరు, అన్న ప్ర‌సాదాలు పంపిణీ చేస్తున్నారు.

ఉద‌యం అల్పాహారంగా పాలు ఉప్మా, పొంగ‌ల్‌, మ‌ధ్యాహ్నం సాంబారన్నం, పులిహోర‌, ట‌మోట రైస్‌, రాత్రి పాలు ఉప్మా, సాంబార‌న్నం భ‌క్తుల‌కు నిరంత‌రాయంగా అందిస్తోన్నారు. రద్దీ ఎక్కువగా ఉండే ప్రాంతాల్లో శ్రీవారి సేవకుల ద్వారా భక్తులకు మొబైల్ వాటర్ డ్రమ్ములతో ఎప్పటికప్పుడు తాగునీరు పంపిణీ చేస్తోన్నారు. ర‌ద్దీకి అనుగుణంగా ఔట‌ర్ రింగ్ రోడ్డులో క్యూలైన్ల వెంబ‌డి ఒక మొబైల్ ఫ‌స్ట్ ఎయిడ్ సెంట‌ర్ అందుబాటులో ఉంచారు.

ఈ నెల 16 నుండీ రద్దీ పెరుగుతూ వస్తోంది. 20వ తేదీ వరకు 4,32,213 మంది భ‌క్తులు శ్రీ‌వారిని ద‌ర్శించుకోవ‌డం విశేషం. ఇందులో అత్య‌ధికంగా 16, 17 తేదీల్లో 90,000 పైగా భ‌క్తులు స్వామివారిని ద‌ర్శించుకున్నారు. త‌ల‌నీలాలు స‌మ‌ర్పించే భ‌క్తుల సంఖ్య కూడా విప‌రీతంగా పెరిగింది. అత్య‌ధికంగా 18, 19, 20 తేదీల్లో 43,000 పైగా భ‌క్తులు స్వామివారికి త‌ల‌నీలాలు స‌మ‌ర్పించారు. దాదాపు 19 ల‌క్ష‌ల‌కు పైగా భ‌క్తుల‌కు అన్న ప్ర‌సాదాలు, టీ, కాఫీ, పాలు, మ‌జ్జిగ అందించింది టీటీడీ.

తేదీ- ద‌ర్శ‌నాలు- త‌ల‌నీలాలు- అన్న ప్ర‌సాదాలు

మే 16- 90,011- 39,083- 4,20,085

మే 17- 91,020- 35,193- 3,81,210

మే 18- 80,455- 43,309- 3,42,670

మే 19- 84,412- 43,032- 4,03,810

మే 20- 86,315- 44,107- 3,99,380

English summary

Tirumala Sees Record Devotees for Sri Venkateswara Darshan as Special sheds have been erected. Hundreds of Srivari Sevaks are continuously distributing drinking water and Annaprasadams to devotees waiting in outside serpentine queue lines in round the clock shifts.ఈ నేప‌థ్యంలో శ్రీ‌వారి ద‌ర్శ‌నార్థం తిరుమ‌ల‌కు వ‌చ్చే భ‌క్తుల సంఖ్య రోజురోజుకు పెరుగుతోంది. దీంతో టీటీడీ విస్తృత ఏర్పాట్లు చేప‌ట్టింది.