నిరుద్యోగులకు శుభవార్త.. భారీగా ఉద్యోగాల భర్తీ.. 15,982 పోస్టులు

తెలంగాణ ప్రభుత్వం ఉద్యోగార్ధులకు శుభవార్త చెప్పింది. రాష్ట్ర వ్యాప్తంగా అంగన్‌వాడీ ఉద్యోగాల భర్తీకి సన్నాహాలు చేస్తోంది. రాష్ట్రంలోని నిరుద్యోగ మహిళలకు ఇది గొప్ప అవకాశంగా మారనుంది. ప్రభుత్వం ఈ ఏడాదిలోనే 15,982 పోస్టులను భర్తీ చేయాలని నిర్ణయించింది. ఈ ప్రక్రియలో హెల్పర్ మరియు టీచర్ పోస్టులు ప్రధానంగా ఉంటాయి. మహిళలకు మాత్రమే ఈ ఉద్యోగాల్లో అవకాశం కల్పించాలని ప్రభుత్వం భావిస్తోంది.

అంగన్వాడీ కేంద్రాలలో పోస్టుల భర్తీ

అంగన్‌వాడీ కేంద్రాలు బాలల సంక్షేమం, పోషణ, మరియు ప్రాథమిక విద్యాభ్యాసానికి కీలకమైనవి. ఈ కేంద్రాల్లో సిబ్బంది కొరత కారణంగా సేవలు సకాలంలో అందకపోవడం జరుగుతోంది. దీన్ని దృష్టిలో ఉంచుకుని ప్రభుత్వం ఖాళీలను గుర్తించి భర్తీ చేయాలని యోచిస్తోంది. 2025-26 సంవత్సరానికి సంబంధించిన పదోన్నతులు, పదవీ విరమణల వల్ల వచ్చిన ఖాళీలు మరియు కొత్తగా సృష్టించిన 708 పోస్టులను కలిపి మొత్తం 15,982 పోస్టులు ఖాళీ ఉన్నాయి.

22.33 శాతం పోస్టులు ఖాళీ

హెల్పర్ పోస్టులు 12,882 ఉండగా, టీచర్ పోస్టులు 3,100 ఉన్నాయి. రాష్ట్రవ్యాప్తంగా 35,781 అంగన్‌వాడీ కేంద్రాలు పనిచేస్తున్నాయి. ఇక్కడ సుమారు 71,562 మంది సిబ్బంది పని చేస్తున్నారు. గత మూడేళ్లలో పదవీ విరమణ, ప్రమోషన్లు, ఇతర శాఖలకు బదిలీలు వంటి కారణాలతో సుమారు 22.33 శాతం పోస్టులు ఖాళీ అయ్యాయి. ఈ సమస్యను పరిష్కరించడం ద్వారా బాలల సంక్షేమ కార్యక్రమాలు మరింత సమర్థవంతంగా నడపవచ్చని అధికారులు ఆశిస్తున్నారు.

ఉద్యోగ భర్తీతో పాటు అంగన్‌వాడీ కేంద్రాల మౌలిక సదుపాయాల మెరుగుదల నిర్ణయం

ప్రభుత్వం ఈ ఉద్యోగ భర్తీతో పాటు అంగన్‌వాడీ కేంద్రాల మౌలిక సదుపాయాలను కూడా మెరుగుపరచాలని నిర్ణయించింది. దాదాపు 9,000 కేంద్రాలకు విద్యుత్ కనెక్షన్లు, 7,700 కేంద్రాలకు మరుగుదొడ్లు, 5,000 కేంద్రాల్లో RO ప్లాంట్లు మరియు LED స్క్రీన్లు ఏర్పాటు చేయనుంది. అలాగే 3,300 కేంద్రాలకు తాగునీటి సౌకర్యం, 1,000 కేంద్రాలకు శాశ్వత భవనాలు నిర్మించాలని ప్రణాళికలు ఉన్నాయి. ఈ చర్యలు అంగన్‌వాడీలను మరింత ఆధునికం చేసి, బాలల అభివృద్ధికి దోహదపడతాయి.

త్వరలోనే నోటిఫికేషన్ లు

శిశు సంక్షేమ శాఖ త్వరలోనే విద్యార్హతలు, నియామక విధానం, వేతనాలు వంటి వివరాలను స్పష్టం చేయనుంది. ముందుగా కొత్త నియామక విధానానికి ఆమోదం పొంది, ఆ తర్వాత జిల్లా స్థాయిలో నోటిఫికేషన్లు విడుదల చేయనుంది. కలెక్టర్ల ఆధ్వర్యంలో ప్రక్రియ సాఫీగా జరగాలని లక్ష్యంగా పెట్టుకున్నారు. ఈ ఉద్యోగాలు మహిళల ఆర్థిక స్వాతంత్ర్యానికి, కుటుంబ సంక్షేమానికి ఉపయోగపడతాయి.

ప్రభుత్వం మార్గదర్శకాలను త్వరగా జారీ చేసి భర్తీ చేపట్టాలని వినతి

ఈ నిర్ణయం తెలంగాణలోని గ్రామీణ మరియు పట్టణ ప్రాంతాల్లో మహిళల సాధికారతను పెంపొందిస్తుందని భావిస్తున్నారు. అంగన్‌వాడీలు సమాజంలో ముఖ్యమైన భాగం కావడంతో, నాణ్యమైన సిబ్బంది ద్వారా సేవలు మెరుగుపడతాయి. ప్రభుత్వం మార్గదర్శకాలను త్వరగా జారీ చేసి, దరఖాస్తు ప్రక్రియను సులభతరం చేయాలని నిరుద్యోగులు ఎదురుచూస్తున్నారు.ఈ కార్యక్రమం ద్వారా రాష్ట్రంలో మహిళా ఉపాధి అవకాశాలు పెరిగుతాయి.

English summary

Good news on jobs. Telangana Govt is set to release notification for 15,982 Anganwadi posts soon. Apply for Anganwadi Teacher and Helper jobs for women in Telangana. Know vacancy details, eligibility, and recruitment process.