కడియం శ్రీహరిపై బాబు ఆగ్రహం

హైదరాబాద్: పార్టీ జై తెలంగాణ అనాల్సిందేనని బహిరంగ ప్రకటన చేసిన సీనియర్ పార్టీ నాయకుడు కడియం శ్రీహరిపై తెలుగుదేశం పార్టీ అధ్యక్షుడు నారా చంద్రబాబు నాయుడు ఆగ్రహం వ్యక్తం చేశారు. పార్టీ సీనియర్లు మీడియాకెక్కడం మంచిది కాదని ఆయన అన్నారు. కడియం శ్రీహరితో పాటు సీనియర్ నాయకులు ఎర్రబెల్లి దయాకరరావు, యనమల రామకృష్ణుడు, నాగం జనార్దన్ రెడ్డి గురువారం చంద్రబాబుతో సమావేశమయ్యారు. కడియం శ్రీహరి ప్రకటనపై సీనియర్లు తీవ్ర ఆగ్రహం వ్యక్తం చేశారు. కడియం శ్రీహరిపై నాగం జనార్దన్ రెడ్డి తీవ్రంగా ధ్వజమెత్తారు. శ్రీహరిపై నాయకత్వం క్రమశిక్షణా చర్యలు తీసుకుంటుందని ఆశిస్తున్నామని ఆయన అన్నారు. స్వార్ధ ప్రయోజనాల కోసం కడియం శ్రీహరి పార్టీని దెబ్బ తీస్తున్నారని ఆయన విమర్శించారు.

తొమ్మిదేళ్లు మంత్రి పదవిని అనుభవించిన కడియం శ్రీహరి బాధ్యతారహితంగా వ్యవహరించడం సరి కాదని ఆయన అన్నారు. అభిప్రాయాలను బహిరంగంగా చెప్పే స్వేచ్ఛ పార్టీలో ఉందని, అటువంటవప్పుడు పార్టీ నేత చంద్రబాబును సంప్రదించకుండా పత్రికలకు ఎక్కడం సరి కాదని యనమల రామకృష్ణుడు అన్నారు. తెలంగాణ ఇస్తామని కాంగ్రెస్, తెస్తామని తెలంగాణ రాష్ట్ర సమితి అన్నాయని, మధ్యలో తాము జోక్యం చేసుకోవడం అనవసరమని తెలుగుదేశం సీనియర్లు అన్నారు. కడియం శ్రీహరి తెలంగాణ పేరుతో భయాందోళనలకు గురి చేయడం సరి కాదని వారన్నారు.