కొట్టుకుపోతే వైయస్ హర్షాలా?: బాబు

హైదరాబాద్: అకాల వర్షాలకు ప్రజలు విలవిలలాడుతుంటే హర్షం వ్యక్తం చేస్తూ ముఖ్యమంత్రి డాక్టర్ వైయస్ రాజశేఖర రెడ్డి పత్రికలకు వాణిజ్య ప్రకటనలు ఇవ్వడాన్ని తెలుగుదేశం పార్టీ అధ్యక్షుడు నారా చంద్రబాబునాయుడు తప్పు పట్టారు. వర్షాల వల్ల కరెంట్ కష్టాలుండవని ముఖ్యమంత్రి ప్రకటనలు ఇవ్వడం సరి కాదని ఆయన సోమవారం మీడియా ప్రతినిధుల సమావేశంలో అన్నారు. రైతులు విలవిలలాడుతున్నారని, స్వామినాధన్ కమీషన్ నివేదికను ఆమోదించి ఉంటే ఈ పరిస్థితి ఉండేది కాదని ఆయన అన్నారు.

అకాల వర్షాలకు హర్షం వ్యక్తం చేస్తూ ముఖ్యమంత్రి కోట్లాది రూపాయలు వెచ్చించడం బాధ్యతారహితమని ఆయన అన్నారు. వాణిజ్య ప్రకటనలకు పెట్టిన ఖర్చును అకాల వర్షాల బాధితులను ఆదుకోవడానికి పెట్టి ఉంటే ఎంతో మేలు జరిగి ఉండేదని ఆయన అన్నారు. ముఖ్యమంత్రి వాణిజ్య ప్రకటనలు ప్రజలను అవమానించే విధంగా ఉన్నాయని ఆయన వ్యాఖ్యానించారు. అకాల వర్షాలకు నష్టపోయిన రైతులకు నష్టపరిహారం ఇవ్వాలని ఆయన డిమాండ్ చేశారు.