తెలంగాణపై మాకే చిత్తశుద్ధి: వైయస్

నిజామాబాద్: తెలంగాణపై తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు చిత్తశుద్ధి లేదని ముఖ్యమంత్రి డాక్టర్ వైయస్ రాజశేఖర రెడ్డి చెప్పారు. నిజామాబాద్ జిల్లా కామారెడ్డి, తదితర ప్రాంతాల్లో ఆయన శుక్రవారం రోడ్ షోలు నిర్వహించారు. తెలంగాణ పట్ల కాంగ్రెసుకు చిత్తశుద్ధి ఉందని, ఈ విషయాన్ని తమ పార్టీ అధిష్ఠానవర్గం పరిశీలిస్తోందని ఆయన చెప్పారు. తెలంగాణ పట్ల చిత్తుశుద్ధి లేని చంద్రశేఖరరావును నిలదీయాలని ఆయన ప్రజలకు సూచించారు. తెలుగుదేశం పార్టీ అధ్యక్షుడు నారా చంద్రబాబునాయుడు ఆ రోజుల్లో మంత్రి పదవి ఇచ్చివుంటే చంద్రశేఖరరావు తెరాసను స్థాపించి ఉండేవారు కారని, మంత్రి పదవి రాకపోవడం వల్లనే తెరాసను స్థాపించారని ఆయన అన్నారు.

తొమ్మిదేళ్ల తెలుగుదేశం పాలనలో అప్పటి ముఖ్యమంత్రి నారా చంద్రబాబునాయుడు ప్రజలకు ఏ విధమైన మేలు చేయలేదని ఆయన విమర్శించారు. తొమ్మిదేళ్లలో చేయలేని మేలు మళ్లీ అధికారంలోకి వస్తే ఎలా చేయగలుగుతారని చంద్రబాబును అడగాలని ఆయన ప్రజలను కోరారు. నాలుగేళ్ల పాటు తమ ప్రభుత్వం ప్రజలకు ఎన్నో మంచి పనులు చేసిందని, తాము చేసిన మంచి పనుల్లో గత తెలుగుదేశం తన 9 ఏళ్ల పాలనతో ఒక్కటి కూడా చేయలేదని ఆయన అన్నారు. తమ ప్రభుత్వం చేపట్టిన అభివృద్ధి, సంక్షేమ కార్యక్రమాలను ఆయన వివరించారు. ఇందిరమ్మ గృహాల్లో అవకతవకలు లేవని, అనర్హులకు ఇళ్లు కేటాయించినట్లు రుజుపు చేస్తే వేయి రూపాయలు బహుమానంగా ఇస్తామని ఆయన చెప్పారు.