బాలయ్య రాజకీయాల్లోకి వస్తారు: శ్రీపతి

హైదరాబాద్: సినీ నటుడు బాలకృష్ణ రాజకీయాల్లోకి రావడం తథ్యమని అఖిల భారత ఎన్టీఆర్ అభిమానుల సంఘం అధ్యక్షుడు, మాజీ శాసనసభ్యుడు శ్రీపతి రాజేశ్వర్ అన్నారు. బాలకృష్ణ రాజకీయాల్లోకి రావడంతో తెలుగుదేశం పార్టీ రాష్ట్రంలో అధికారంలోకి రావడం ఖాయమని ఆయన అన్నారు. హైదరాబాదులోని సంజీవరెడ్డి నగర్ లో మంగళవారం జరిగిన బాలకృష్ణ జన్మ దిన వేడుకల్లో ఆయన ప్రసంగించారు.

సంజీవరెడ్డి నగర్ లో బాలకృష్ణ జన్మదిన వేడుకలు ఘనంగా జరిగాయి. ఈ సందర్భంగా అభిమానులు కేక్ కట్ చేశారు. అఖిల భారత ఎన్టీఆర్ అభిమానుల సంఘం ఆధ్వర్యంలో ఈ వేడుకలు జరిగాయి. బాలకృష్ణ ప్రస్తుతం అమెరికాలో ఉన్నారు. అక్కడి నుంచి రాగానే ఈ నెలాఖరులో విజయవాడలో రాజకీయ వేదికపై ప్రసంగిస్తారని అంటున్నారు. అప్పటి తెలుగుదేశం పార్టీ అధ్యక్షుడు మీ కోసం యాత్ర విజయవాడకు చేరుకుంటుందని సమాచారం.