మన్మోహన్ పై బుష్ ప్రశంసల జల్లు

టోక్యో: జపాన్ లో జరుగుతున్న జి - 8 దేశాల సదస్సు సందర్భంగా భారత ప్రధాని డాక్టర్ మన్మోహన్ సింగ్ బుధవారం అమెరికా అధ్యక్షుడు జార్జి బుష్ తో సమావేశమయ్యారు. ఇరువురు నేతల మధ్య దాదాపు 45 నిమిషాల పాటు సమావేశం జరిగింది. అమెరికా, భారత్ ల మధ్య సంబంధాలు ఇప్పడున్నంత ఉత్తమంగా మునుపెన్నడూ లేవని మన్మోహన్ సింగ్ సమావేశానంతరం మీడియా ప్రతినిధులతో అన్నారు. ఈ సబంధాల పట్టల తానెంతో సంతృప్తిగా ఉన్నానని ఆయన చెప్పారు. తక్షణ సమస్యలపై అమెరికా, భారత్ భుజం భుజం కలిపి సాగుతాయని ఆయన చెప్పారు.

తాము అణు ఒప్పందంపై చర్చించామని, ఇది ఇరు దేశాలకు కీలకమని జార్జి బుష్ అన్నారు. మన్మోహన్ సింగ్ నాయకత్వ లక్షణాలపై ఆయన ప్రశంసల జల్లు కురిపించారు. ఇరు దేశాల్లో వ్యతిరేకత ఎదరవుతున్నప్పటికీ ఇరు దేశాలకు ఉపయోగకరమని ఆయన అన్నారు. వామపక్షాల మద్దతు ఉపసంహరణ వల్ల తమ ప్రభుత్వానికి నష్టమేమీ లేదని మన్మోహన్ సింగ్ అన్నారు. సమాజ్ వాదీ పార్టీ పేరు చెప్పకుండా తాము రాజకీయ ప్రత్యామ్నాయాలను చూసుకున్నామని ఆయన చెప్పారు.