కాంగ్రెసులో చేరిన రాజశేఖర్ దంపతులు

హైదరాబాద్: సినీ నటుడు రాజశేఖర్, జీవిత దంపతులు సోమవారం కాంగ్రెస్ పార్టీలో చేరారు. కాంగ్రెస్ ఆంధ్రప్రదేశ్ వ్యవహారాల ఇంచార్జి వీరప్ప మొయిలీ, ప్రదేశ్ కాంగ్రెస్ కమిటీ (పిసిసి) అధ్యక్షుడు డి. శ్రీనివాస్, ముఖ్యమంత్రి డాక్టర్ వైయస్ రాజశేఖర రెడ్డి సమక్షంలో వారు కాంగ్రెసులో చేరారు. పేదలకు సేవ చేస్తున్న ముఖ్యమంత్రి డాక్టర్ వైయస్ రాజశేఖర రెడ్డి ఉన్న పార్టీలో చేరడం తమ అదృష్ణమని రాజశేఖర్ అన్నారు. తెలుగువారి రుణం తీర్చుకుంటానని ఆయన అన్నారు. ముఖ్యమంత్రిని ఆయన పొగడ్తలతో ముంచెత్తారు. తాను కొత్త జీవితంలో ప్రవేశించానని ఆయన అన్నారు.

పార్టీకి తన నుంచి ఏం కోరుకుంటుందో ఆ పనులు చేస్తానని ఆయన చెప్పారు. పేదల కోసం నిరంతరం కృషి చేస్తానని ఆయన చెప్పారు. ముఖ్యమంత్రి మంచి మనిషి అని, నమ్ముకున్న వారిని ముఖ్యమంత్రి ఆదుకుంటారని ఆయన చెప్పారు. సినీ నటుడిగా కొనసాగుతానని, పార్టీ ద్వారా ప్రజలకు సేవలు చేస్తానని ఆయన చెప్పారు. పార్టీ ఆదేశాల మేరకు నడుచుకుంటానని ఆయన చెప్పారు. పార్టీ అభిప్రాయమే తన అభిప్రాయమని ఆయన చెప్పారు. ఏ పదవులు ఇచ్చినా నిర్వహిస్తామని వారు చెప్పారు.