అద్వానీతో విజయశాంతి చర్చలు

న్యూఢిల్లీ: భారతీయ జనతా పార్టీ (బిజెపి) అగ్రనేత ఎల్.కె. అద్వానీతో తల్లి తెలంగాణ వ్యవస్థాపక అధ్యక్షురాలు విజయశాంతి మంగళవారం భేటీ అయ్యారు. అద్వానీతో ఆమె తెలంగాణపై చర్చించారు. తెలంగాణ రాష్ట్ర ఏర్పాటుకు బిజెపి ఒక్కటి తీర్మానం చేస్తే సరిపోదని, జాతీయ ప్రజాస్వామ్య కూటమి (ఎన్డీయె) తీర్మానం చేయాలని ఆమె అద్వానీతో చెప్పారు. అందుకు అద్వానీ సానుకూలంగా ప్రతిస్పందించారని విజయశాంతి చెప్పారు.

తెలుగుదేశం, తెలంగాణ రాష్ట్ర సమితి (తెరాస) సమైక్యవాద సిపిఎంను వదిలి ఎన్డీయెలో చేరాలని ఆమె కోరారు. ఆమె మంగళవారంనాడు బిజెపి జాతీయాధ్యక్షుడు రాజ్ నాథ్ సింగ్ ను కూడా కలిశారు. తెలంగాణ రాష్ట్ర సాధన కోసం తెలంగాణ పార్టీలన్నీ ఏకమై ఎన్డీయెలో చేరాలని ఆమె ఇటీవల హైదరాబాదులో సూచించారు. జాతీయ పార్టీల వల్లనే తెలంగాణ రాష్ట్ర సాధన సాధ్యమవుతుందని, దేశంలో రెండే జాతీయ పార్టీలున్నాయని, కాంగ్రెస్ తెలంగాణకు వ్యతిరేకంగా ఉన్నందున అనుకూలంగా ఉన్న బిజెపితో కలిసి తెలంగాణ పార్టీలు కలిసి పనిచేయాలని ఆమె అన్నారు.