నిజాయితీని కోరుకుంటున్నారు: దేవేందర్

హైదరాబాద్: తెలంగాణ కోసం నిజాయితీగా పనిచేసే పార్టీలతో కలిసి పని చేస్తామని నవ తెలంగాణ ప్రజా పార్టీ (ఎన్టీపిపి) అధ్యక్షుడు టి. దేవేందర్ గౌడ్ చెప్పారు. తెలంగాణ ప్రజలు నిజాయితీ గల నాయకత్వాన్ని కోరుకుంటున్నారని ఆయన చెప్పారు. తెలంగాణ కోసం ఉద్యమంచే శక్తులన్నింటితో కలిసి పనిచేయడానికి తాము సిద్ధంగా ఉన్నామని ఆయన చెప్పారు. పార్టీ కార్యాలయం ప్రారంభోత్సవం సందర్భంగా ఆయన గురువారం మాట్లాడారు. ఈ నెల 27వ తేదీన జరిగే బహిరంగ సభలో పార్టీ విధివిధానాలు ప్రకటించనున్నట్లు ఆయన తెలిపారు.

సికింద్రాబాదులోని పరేడ్ గ్రౌండ్స్ లో సభ నిర్వహించాలనుకుంటే అడ్డు పడ్డారని ఆయన విమర్శించారు. అందరి సహకారంతో తెలంగాణ సాధనకు కృషి చేస్తామని ఆయన చెప్పారు. స్పష్టమైన విధానం లేకుండా తెలుగుదేశం పార్టీ అధ్యక్షుడు నారా చంద్రబాబునాయుడు అధికారం కోసం పాకులాడుతున్నారని ఆయన అన్నారు. కొత్త నాయకత్వంతో ముందుకు వచ్చే పార్టీలను స్వాగతించాలని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డికి, తెలుగుదేశం పార్టీ అధ్యక్షుడు ప్రజల అవస్థలు పట్టడం లేదని ఆయన అన్నారు.