దేవేందర్ ఎన్టీపిపి ఆఫీసు ప్రారంభం

హైదరాబాద్: టి. దేవేందర్ గౌడ్ నాయకత్వంలోని నవ తెలంగాణ ప్రజా పార్టీ (ఎన్టీపిపి) కార్యాలయాన్ని ఫాతిమా బీ గురువారంనాడు ప్రారంభించారు. ఈ ప్రారంభోత్సవ కార్యక్రమానికి వృద్ధ నేత కొండా లక్ష్మణ్ బాపూజీ, కాంగ్రెస్ నాయకుడు శ్రీధర్ రెడ్డి హాజరయ్యారు. పార్టీ సమాచార కేంద్రాన్ని దేవేందర్ గౌడ్ ప్రారంభించారు. కార్యాలయ ప్రారంభం సందర్భంగా సర్వమత ప్రార్థనలు జరిగాయి.

తమ పార్టీలో ఇద్దరు ముగ్గురు నాయకులు మాత్రమే లేరని, 12 వేల మంది ఉన్నారని, వారి పూర్తి సమాచారం తమ వద్ద ఉందని పార్టీ నాయకుడు పెద్దిరెడ్డి అన్నారు. ఈ నెల 15వ తేదీ నుంచి జిల్లాకు రెండు చొప్పున పరిచయ వేదికలు నిర్వహిస్తామని, ఈ వేదికల ద్వారా వివిధ వర్గాల అభిప్రాయాలు సేకరిస్తామని ఆయన చెప్పారు. ఈ నెల 20వ తేదీన హైదరాబాదులోని నిజాం కళాశాల మైదానంలో బహిరంగ సభ నిర్వహిస్తామని ఆయన చెప్పారు. ఈ సభలో పార్టీ విధివిధానాలను ప్రకటిస్తామని ఆయన చెప్పారు.