మరింత అభివృద్ధి జరిగేది: వైయస్

హైదరాబాద్: మాజీ ప్రధాని స్వర్గీయ రాజీవ్ గాంధీ జీవించి ఉంటే దేశం మరింత అభివృద్ధి చెంది ఉండేదని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. పేదరికం లేని భారతదేశాన్ని రాజీవ్ గాంధీ కలలు కన్నారని ఆయన అన్నారు. రాజీవ్ గాంధీ జయంతి సందర్భంగా ఆయన బుధవారం పలు కార్యక్రమాల్లో పాల్గొన్నారు. పిసిసి కార్యాలయం గాంధీ భవన్ లో మెగా వైద్య శిబిరాన్ని ఆయన ప్రారంభించారు. నేత్రదాన, రక్త దాన శిబిరాలను కూడా ఆయన ప్రారంభించారు.

రాజీవ్ గాంధీ జయంతి సందర్భంగా ఏర్పాటైన సద్భావనా యాత్రను ఆయన ప్రారంభించారు. యువతను 21వ శతాబ్దిలోకి నడిపించే కార్యక్రమాలకు రాజీవ్ గాంధీ శ్రీకారం చుట్టారని ఆయన అన్నారు. ప్రపంచంలోనే అగ్రగామిగా భారత యువత ఎదగాలని రాజీవ్ ఆకాంక్షిచారని ఆయన చెప్పారు. ఈ కార్యక్రమాల్లో పిసిసి అధ్యక్షుడు డి. శ్రీనివాస్, తదితరులు పాల్గొన్నారు.