చిరు సభకు అనంత నుంచి భారీ స్పందన!

అనంతపురం: తిరుపతి వేదికగా ఆగస్టు 26వ తేదీన జరుగనున్న చిరంజీవి పార్టీ బహిరంగ సభకు అనంతపురం నుంచి అధిక సంఖ్యలో జన సమీకరణ చేయాలని జిల్లా చిరు అభిమాన సంఘాలు నిర్ణయానికొచ్చారు. చిరంజీవి అభిమాన సంఘాలు తమ ప్రాంతాల వారీగా జన సమీకరణకు ఏర్పాట్లు చేస్తున్నారు. అనంతపురం జిల్లా నుంచి చిరు పార్టీ తరపున టికెట్లు ఆశించేవారందరూ తమ వంతు పాత్రను ఘనంగా పోషించేందుకు కృషి చేస్తున్నారు.

చిరు సభకు తిరుపతికి ఎన్ని వాహనాలు బయలుదేరుతున్నాయో ఆ వివరాలను చిరంజీవి పార్టీ కార్యాలయానికి ఫ్యాక్స్ ద్వారా పంపించాలని చిరంజీవి సలహాదారు రాము యాదవ్ చెప్పారు. అనంతపురం జిల్లా నుంచి చిరు సభకు సంబంధించి జన సమీకరణ వివరాలు తెలుసుకోడానికి యాదవ్ ఇక్కడకు బుధవారం వచ్చారు. చిరంజీవి సభకు దాదాపు 10లక్షల మంది వస్తారని నిర్వాహకులు అంచనా వేస్తున్నారు. జిల్లాలో ప్రముఖ నాయకులకు మాత్రమే పాసులను జారీ చేస్తున్నారు. అనంతపురం జిల్లా నుంచి దాదాపు రెండువేల వాహనాలు తిరుపతికి బయలుదేరుతాయని నిర్వాహకులు ఒక అంచనాకు వచ్చారు.