చిరు పార్టీలో చేరిన కోటగిరి

హైదరాబాద్: మాజీ మంత్రి కోటగిరి విద్యాధరరావు సోమవారం చిరంజీవి నాయకత్వంలోని ప్రజారాజ్యం పార్టీలో చేరారు. విద్యాధరరావును చిరంజీవి లాంఛనంగా పార్టీలో చేర్చుకున్నారు. చాలా కాలం క్రితమే విద్యాధరరావు తెలుగుదేశ పార్టీ నుంచి బహిష్కరణకు గురైన విషయం తెలిసిందే. ప్రజారాజ్యం పార్టీ ఆవిర్భావ సభలో ఆయన కీలక పాత్ర కూడా నిర్వహించారు. ప్రజారాజ్యంలో చేరినందుకు తనకు ఆనందంగా ఉందని కోటగిరి విద్యాధరరావు చెప్పారు.

తమ పశ్చిమ గోదావరి జిల్లాలో ఎక్కువ మంది బడుగు, అణగారిన వర్గాలవారేనని, వారికి తాను ఇప్పటి వరకు తగిన మేలు చేయలేకపోయాయని, ఇప్పుడు ప్రజారాజ్యంలో చేరడం ద్వారా వారికి తగిన సేవలు అందించగలనని ఆయన చెప్పారు. తెలుగుదేశం పార్టీలో ఉండి వారికి మేలుచేసే పరిస్థితులు లేకపోవడమే తాను ప్రజారాజ్యంలోకి రావడానికి కారణమని ఆయన చెప్పారు. చిత్తూరు మాజీ పార్లమెంటు సభ్యుడు జ్ఞానేందర్ రెడ్డి కూడా చిరంజీవి ప్రజారాజ్యం పార్టీలో చేరారు.