లబ్ధికే టిడిపి తెలంగాణ పాట: దేవేందర్

హైదరాబాద్: రాజకీయ లబ్ధి కోసమే తెలుగుదేశం పార్టీ తెలంగాణ పాట పాడుతోందని నవ తెలంగాణ ప్రజా పార్టీ (ఎన్టీటిపి) నాయకుడు టి. దేవేందర్ గౌడ్ విమర్శించారు. రంగారెడ్డి జిల్లా వికారాబాద్ నుంచి ఆయన గురువారం తెలంగాణ ఆత్మగౌరవ యాత్రను ప్రారంభించారు. వికారాబాద్, చేవెళ్ల తదితర ప్రాంతాల్లో ఆయన పార్టీ జెండాలను ఆవిష్కరించారు. ఆరె మైసమ్మ, అనంత పద్మనాభ ఆలయాల్లో ఆయన ప్రార్థనలు చేశారు. ఈ యాత్ర గాంధీ జయంతి అక్టోబర్ రెండవ తేదీవరకు సాగుతుందని ఆయన చెప్పారు.

తెలంగాణ ప్రజల సమస్యలను రాష్ట్ర ప్రజలకు తెలియజేయడానికే ఈ యాత్ర చేస్తున్నట్లు ఆయన తెలిపారు. తెలంగాణ రాష్ట్ర ఏర్పాటు కోసం పనిచేసే వారందరినీ కలుపుకుని పోతామని ఆయన చెప్పారు. తెలంగాణ సంక్షేమానికి పాటు పడుతామని వలసపాలకులు చెప్పడం విడ్డూరమని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డి తెలంగాణ భూములు అమ్మి ఇడుపులపాయలో ఖర్చు పెడుతున్నారని ఆయన విమర్శించారు.