దేవేందర్ తో దోస్తీకి కాంగ్రెస్ యత్నం

హైదరాబాద్: వచ్చే ఎన్నికల్లో నవ తెలంగాణ ప్రజా పార్టీ (ఎన్టీపిపి) నేత టి. దేవేందర్ గౌడ్ ను కలుపుకుని పోవాలని కాంగ్రెస్ పార్టీ ప్రయత్నిస్తున్నట్లు సమాచారం. అన్ని పార్టీలు తమకు దూరం కావడంతో దేవేందర్ గౌడ్ ను తమతో కలుపుకునే ప్రయత్నాల్లో పడినట్లు తెలుస్తోంది. తెలంగాణ రాష్ట్రం ఏర్పాటుపై ప్రధాని మన్మోహన్ సింగ్ ను, కాంగ్రెస్ అధ్యక్షురాలు సోనియా గాంధీని, ఇతర నాయకులను కలవడానికి ఆయన సోమవారం ఢిల్లీకి చేరుకున్నారు.

వచ్చే ఎన్నికల్లో దేవేందర్ గౌడ్ తో స్నేహం కుదుర్చుకోవడానికి వీలుగా కాంగ్రెస్ నాయకులు ప్రయత్నాలు చేస్తున్నట్లు వార్తలు వస్తున్నాయి. ఇందులో భాగంగా ఆయనకు సోనియా అపాయింట్ మెంట్ ఇప్పించడానికి కాంగ్రెస్ సీనియర్ నాయకులు ప్రయత్నిస్తున్నట్లు తెలుస్తోంది. దేవేందర్ గౌడ్ రేపో మాపో సోనియాతో భేటీ కావచ్చునని చెబుతున్నారు. తెలంగాణ రాష్ట్ర సమితి (తెరాస) తెలుగుదేశం పార్టీతో పొత్తు పెట్టుకునే అవకాశాలున్నాయనే భావనతో మరో తెలంగాణ పార్టీ ఎన్టీపిపిని తమతో పాటు తీసుకుని పోవాలని కాంగ్రెస్ నాయకులు భావిస్తున్నట్లు తెలుస్తోంది.