యువరాజ్ పోకిరీ చేష్టలు

భువనేశ్వర్: భారత క్రికెట్ క్రీడాకారుడు యువరాజ్ సింగ్ పోకిరి చేష్టలు మరోసారి బయటపడ్డాయి. మాజీ కేంద్ర మంత్రి దిలీప్ రాయ్ కుమారుడు సందీప్ రాయ్ తో యువరాజ్ వివాదానికి దిగాడు. ఈ సంఘటన మంగళవారం రాత్రి జరిగింది. ఆలస్యంగా వెలుగులోకి వచ్చింది. మూడు జట్ల మధ్య జరిగే చాలెంజర్ ట్రోఫీలో పాల్గొనడానికి యువరాజ్ సింగ్ భువనేశ్వర్ వచ్చాడు. రాత్రి పదిన్నర గంటల ప్రాంతంలో యువరాజ్ తన తోటి ఆటగాళ్లతో ఉన్నాడు. ఇదే సమయంలో సందీప్ రాయ్ తన భార్యతో కూర్చుని ఉన్నాడు. సందీప్ రాయ్ ను చూసి యువరాజ్ చూసి ఏవో వ్యాఖ్యలు చేశాడు.

యువరాజ్ చేసిన వ్యాఖ్యలు ఒక అంతర్జాతీయ క్రీడాకారుడి స్థాయికి తగినట్లుగా లేవని హోటల్ వర్గాలంటున్నాయి. యువరాజ్ వ్యాఖ్యలకు సందీప్ కు కోపం వచ్చింది. ఈ సమయంలో ఇరువురు పరస్పరం హిందీలోనూ, ఆంగ్లంలోనూ దూషించుకున్నారు. హోటల్ సీనియర్ సిబ్బంది జోక్యంతో వివాదం సద్దుమణిగింది. దాదాపు 15 నిమిషాల పాటు ఇరువురి మధ్య జగడం నడిచింది. చాలెంజర్ ట్రోఫీలో యువరాజ్ సింగ్ ఇండియా బ్లూ జట్టుకు నాయకత్వం వహిస్తున్నాడు. ఈ వివాదంపై హోటల్ వర్గాలు అధికారికంగా చెప్పడానికి నిరాకరిస్తున్నారు. గురువారంనాడు మాట్లాడడానికి యువరాజ్ అందుబాటులో లేడు.